Xayrullo Bozorov “Qo'qon-1912” a'zolari bilan uchrashdi

Ertaga Qo'qon shahrida katta futbol bayrami. “Qo'qon-1912” jamoasi O'zbekiston kubogining yarim final o'yinida, Toshkentning “Paxtakor” jamoasini qabul qiladi.

Ushbu o'yindan oldin Farg'ona viloyati xokimi Xayrulla Xayitboevich Bozorov hamda Qo'qon shahar xokimi Marufjon A'zamovich Usmonovlar “Qo'qon-1912” jamoasi a'zolari bilan uchrashdilar. Uchrashuvda viloyat xokimi so'z olib, jumladan shunday dedilar.

-Qo'qon shahri o'zbek futbolining vatani hisoblanadi. Bu mavsumda “Qo'qon-1912” jamoasi a'zolari , ya'ni sizlar juda chiroyli o'yin ko'rsatib, yaxshi natijalarni qayd etib barchamizni xursand qildingiz. Buning uchun klub rahbarlariga , murabbiylar shtabiga hamda barcha futbolchilarga o'zimni cheksiz minnatdorchiligimni izhor qilaman. Futbol shunday o'yinki, bu o'yindagi natija butun xalqning kayfiyatini belgilab beradi. Sizlar g'alaba qozonsangiz Qo'qonda va butun viloyatimizda bayram bo'ladi.

Ertaga “Qo'qon-1912” jamoasi uchun juda muhim kun. Ertangi “Paxtakor” bilan bo'ladigan yarim final o'yinini “yil o'yini” deb atasak xato bo'lmaydi. Ertaga sizlar Qo'qon futboli tarixiga o'z nomingizni zarhal xarflar bilan yozib qo'yadigan kun. Men sizlarga ishonaman, sizlar O'zbekiston kubogining finaliga chiqishni uddalaysiz. Biz sizlar bilan Namanganga borishni istaymiz. Namangandagi stadionga butun Qo'qon halqi boradi. Biz Namanganda bayram qilishni istaymiz. Takror aytaman bu ish sizlarni qo'lingizdan keladi.

Hurmatli futbolchilar ertaga maydonda bor kuch va mahoratingizni sarflab, bor vujudingiz bilan g'alaba uchun harakat qiling. Biz sizlarni mehnatingizni qadrlaymiz. Sizlarga final yo'lida omad, kuch-quvvat hamda sog'lik tilayman – dedi Xayrullo Bozorov.

Manba: "Qo'qon-1912" matbuot xizmati