«Istanbul» murabbiyi birinchi bo'lib ruminiyalik hakamni haqorat qilgan

Evropa chempionlar ligasi guruh bosqichining 6-turidan o'rin olgan «PSJ» va «Istanbul Bashakshehir» jamoalari o'rtasidagi o'yin katta mojarolarga sabab bo'ldi.

Jurnalist Emanuel Roshu tarqatgan xabarga ko'ra, mojaro dastlab istanbulliklar yordamchi murabbiyi Per Vebo tomonidan boshlangan. Manbaga ko'ra, mutaxassis bahsning 2-daqiqasidan boshlab hakamlarni "lo'lilar" deb haqorat qila boshlagan.

Zaxira hakami Sebastyan Koltsesku esa Veboga qarata «negru» so'zini ishlatgan («rumin tilida "qora» ma'nosini anglatadi). Oqibatda «Istanbul» futbolchilari maydonni tark etishdi va o'yin to'xtab qoldi.

Eslatib o'tamiz, bahs 9 dekabr kuni 14-daqiqadan boshlab davom ettiriladi. UEFA o'yinga niderlandiyalik hakamlar boshchiligidagi yangi rasmiy shaxslarni tayinladi.