Evropa ligasi. «Vilyarreal» — «Qorabog'» o'yini belgilangan vaqtda o'tkazilmaydi

Evropa ligasi guruh bosqichi 6-turidan o'rin olgan "Vilyarreal" — "Qorabog'" belgilangan vaqtda o'tkazilmaydigan bo'ldi. Eslatib o'tamiz, mazkur uchrashuv 10 dekabr, payshanba kuni bo'lib o'tishi kerak edi.

"Vilyarreal" rasmiy sayti tarqatgan xabarga ko'ra, ozarboyjonliklar safida koronavirusga chalinganlar ko'paygani uchun bahs bekor qilingan.

"Qorabog'" esa o'yinda ishtirok etish uchun etarli futbolchilarga ega emas. Ushbu o'yin taqdiri bo'yicha UEFA qaror qabul qiladi.

Ispaniyaliklar "I" guruhida 13 ochko bilan 1-o'rin masalasini hal qilib bo'lishgan. "Qorabog'" esa 1 ochko bilan so'nggi pog'onani egallab turibdi. Jamoa pley-offga chiqish imkoniyatini yo'qotgan.