Markus Reshford: «Ruhiyat namoyish qilganimiz yaxshi, lekin idealda gol o'tkazmaganimiz ma'qul»

«Manchester Yunayted» hujumchisi Markus Reshford Angliya chempionatining 11-turi doirasida bo'lib o'tgan «Vest Xem»ga qarshi o'yin (3:1) borasida o'z fikrini bildirib o'tdi.

«Raqib jamoaning birinchi gol urish holatiga barham berishimiz kerak. Agar o'z darvozamiz daxlsizligini saqlab qolsak, g'alabali o'yinlar soni ko'p bo'ladi. Ruhiyat namoyish qilganimiz yaxshi, lekin idealda gol o'tkazmaganimiz ma'qul.

Bugun yomon himoyalanmadik. Raqib jamoa safida qarshi hujumda xavfli o'yinchilar bor. Ularga qarshilik ko'rsata oldik. Tanaffus — o'yinni o'zgartirish uchun yaxshi imkoniyat. Biz bundan foydalandik.

Kelasi haftada Chempionlar ligasi doirasida katta o'yin kutib turibdi. «PSJ»ga qarshi o'yindagi mag'lubiyat tufayli keyingi bahsda g'alaba qozonish muhim ahamiyatga ega. Muxlislar tufayli o'yinimiz o'zgacha bo'ladi. Tomoshabinlarning stadionga qaytishi munosabati bilan ajoyib hissiyotlarni his qilasan», – dedi Refshord.