APL to'purari: Kalvert-Lyuin 11 o'yinda 11ta gol urdi

Angliya chempionatining 11-turi doirasida bo'lib o'tgan "Byornli" va "Everton" jamoalari o'rtasidagi uchrashuv 1:1 hisobida yakunlandi.

Mezbonlar 3-daqiqadayoq hisobni ochishgan bo'lsa, mersisaydliklar birinchi bo'limga qo'shib berilgan daqiqalarda Dominik Kalvert-Lyuinning goli evaziga muvozanatni tiklashdi.

Angliyalik futbolchi uchun mazkur gol joriy mavsumda 11-gol bo'ldi. U APLda to'purarlar poygasini boshqarmoqda. Undan keyingi pog'onada 9ta gol bilan Son Xyong Min kelayotgan bo'lsa, Muhammad Saloh va Jeymi Vardi hisobida 8tadan gol mavjud.

Kalvert-Lyuin APLning bir mavsumidagi gollar soni bo'yicha shaxsiy rekordini takrorlash uchun 2ta gol qoldi. U o'tgan mavsumni 13ta gol bilan yakunlagan edi. Shuningdek, Dominik Angliya liga kubogining joriy mavsumida 2ta golga mualliflik qildi.

Kalvert-Lyuin 2016 yilning yozida 1,8 mln evro evaziga "Sheffild Yunayted"dan "Everton" safiga o'tgan edi. Transfermarkt hozirda uni 40 mln evroga baholagan.