2020 yilgi futbol mavsumida «Nasaf»dan o'zgacha xet-trik natija

O'zingizga ma'lum, garchi oldinda bizni O'zbekiston kubogi musobaqasi kutib turgan bo'lsada 2020 yilgi futbol mavsumi o'z nihoyasiga etdi va bu mavsum "Nasaf" tarixidagi eng sermahsul yil bo'ldi deb bemalol aytish mumkin.

Bosh jamoa o'z tarixida uchinchi marotaba Superligada kumush medallarini (2011, 2017, 2020), yoshlar U-21 birinchiligida bronza medallarini, U-18 jamoasi esa ketma-ket uchinchi marotaba O'zbekiston chempionligini qo'lga kiritdi (2018, 2019, 2020).

Darhaqiqat bu o'rinlar "Nasaf" jamoalari uchun begona emas. Chunki bosh jamoamiz kumush medallarini ilk marotaba 2011 yilda qo'lga kiritgan bo'lsa, yoshlarimiz esa o'z birinchiligida O'zbekiston chempionligini qo'lga kiritgan edi. Ammo shuni unutmaslik kerakki 2011 yildagi va jamoamizning hozirgi tarkibi o'rtasida er bilan osmoncha farq bor. «G'oliblar muhokama qilinmaydi» biz yuqoridagi fikrimiz bilan jamoamiz tarixini ikkiga bo'lishdan yiroqmiz, shunchaki o'sha paytda yo'lga qo'yilgan tizim bugun o'z natijasini ko'rsatayotganligini keltirib o'tmoqchimiz xolos. «Nasaf» ikki yillik tanaffusdan so'ng bugungi natijaga asosan o'z tarbiyalanuvchilari bilan erishdi. Bu klubimiz, futbol maktabimiz uchun katta yutuq ekanligini qayd etib o'tishimiz joiz. Bu ham «Nasaf» futbol maktabiga OFK tomonida ikki yulduzli maqomi bejizga berilmaganining yaqqol isbotidir.

Yana bir qiziq jihat: Umidjon Ergashev, Umarbek Eshmurodov, Sharof Muhitdinov, Islom Kenjaboev, G'olib G'aybullaev, Dilshod Saitov, Dilshod Rahmatullaev, Bobir Abdixoliqov "Nasaf" bilan ikkinchi marotaba kumush medallarini qo'lga kiritishdi.

Husayn Norchaev mavsum davomida bosh jamoa, U-21 hamda U-18 jamoalari tarkibida harakat qilib O'zbekiston chempioni, Superliga kumush medallarini va U-21 birinchiligida bronza medallarini qo'lga kiritgan ilk futbolchi bo'ldi.

Joriy mavsumda «Nasaf» futbol maktabi tarbiyalanuvchilaridan to'rt nafari bosh jamoa safida debyut qilgan. Bular Husayn Norchaev, Shohmalik Komilov, Murodbek Xo'jamberdiev va Abubakrrizo Turdialievlar bo'lishdi. Bundan tashqari oxirgi yillarda U-21 tarkibida harakat qilgan Muhriddin Zoirov ham bosh jamoa tarkibida debyut qildi. Husayn Norchaev raqiblar darvozasini uch bora aniq nishonga olgan bo'lsa, Shohmalik Komilov bir marotaba raqib darvozasini ishg'ol etdi. Abubakrrizo Turdialiev ikki marotaba golli uzatmani amalga oshirishga muvaffaq bo'ldi.

Jamoamiz Ro'ziqul Berdiev qo'l ostida oltinchi marotaba sovrinli o'rinni qo'lga kiritdi:

2017, 2020 yilgi mavsumda chempionatning kumush medallari sohibi;
2013, 2014, 2015, 2016 yillarda chempionatning bronza medallari sohibi;
2015 yilda O'zbekiston kubogi;
2016 yilda O'zbekiston Superkubogi.
2020 yilda «Nasaf» futbol klubi natijalari:

Bosh jamoa. Kumush medallari sohibi

U-21. Bronza medallari sohibi

U-18. O'zbekiston Chempioni

2020 yildagi mavsumda jamoamiz to'purarlari:

1. Bobir Abdixoliqov — 17 gol
2. Marko Stanoevich — 6 gol
3. Islom Kenjaboev — 5 gol
4. Oybek Bozorov — 5 gol
5. Sharof Muhitdinov — 5 gol
6. Husayn Norchaev — 3 gol
7. Akmal Mozgovoy — 2 gol
8. Shohmalik Komilov — 1 gol
9. Dilshod Rahmatullaev — 1 gol
10. Dilshod Saitov — 1 gol