Yovan Jokich: «AGMK bilan tarix yarayotganimizdan xursandman»

AGMK tarixidagi muvaffaqiyatli mavsumga aylanayotgan joriy yil yakunlanishiga oz fursat qoldi. Chempionat tugashiga bir tur qolganda jamoamiz Superliga bronza medallarini qo'lga kiritdi. Shu munosabat bilan jamoamizning serbiyalik legioneri Yovan Jokichning joriy mavsum haqidagi fikrlari bilan qiziqdik.

«Ajoyib va murakkab mavsumni o'tkazdik. AGMK bilan ikkinchi bor birgalikda tarix yaratayotganimdan xursandman. Bunga qadar jamoa bilan kubokda g'olib chiqqandim, endilikda AGMK birinchi marotaba chempionat sovrindoriga aylandi. Bu yo'lda jamoa uchun xizmat qilganimdan mamnunman.

Murabbiylar shtabi, futbolchi jamoadoshlarim, klubda xizmat qilayotgan barcha personal hamda rahbariyat va albatta muxlislarga tashakkur bildirmoqchiman. Oson bo'lmagan mavsum va yil davomidagi fors-major holatlarida doimo bir-birimizni qo'llab-quvvatladik.

Aynan shunday hamjihatlik va bir ahil oilaga aylanganimiz muvaffaqiyat sari etakladi. Mavsum davomida haqiqiy jamoaga aylana oldik. Bronza medalini oilamga bag'ishlamoqchiman. O'zbekistondagi faoliyatim omadli kechmoqda deb bemalol ayta olaman. Dastlabki yil O'zbekiston kubogini qo'lga kiritdim, keyinchalik kumush medal va superkubokda g'olib chiqdim. Bu yil esa bronza medaliga ega chiqyapman.

O'ylaymanki, bu hali hammasi emas. Bizni yana kubok o'yinlari kutmoqda va olmaliqlik muxlislarni hali yana xursand qilish niyatidamiz», — deya o'z fikrlari bilan o'rtoqlashdi jamoa etakchisi Yovan Jokich.