Ivan Yosovich: "Qo'qon-1912" safida o'ynaganimdan baxtiyorman"

Bu yilgi mavsumda “Qo'qon-1912” jamoasi safida ikki nafar Serbiyalik legioner futbolchilar harakat qilishdi. Hujumchi Filip Rayevats avval ham bu jamoa safida to'p surgan. Rayevats O'zbekistonda “Bunyodkor”, “Lokomotiv” jamoalarida ham o'ynashga ulgurgan.Himoyachi Ivan Yosovich esa bu mavsumda ilk bor o'zbek klubi sharafini himoya qildi. Kecha tunda Yosovich hamda Rayevatslar o'z yurtlariga uchib ketishdi. “Qo'qon-1912” jamoasining markaziy himoyachisi bo'lgan Ivan Yosovich ketishidan avval O'zbekistondagi taassurotlari haqida klub matbuot xizmatiga qisqacha intervyu berdi.

- Avvalo shunday go'zal yurtda bo'lish menga nasib qilganidan xursandman. Men superliganing 24-turidan o'rin olgan “Qo'qon-1912” – “Lokomotiv” bahsida boshimdan jarohat oldim. Boshim yorilib , o'yinni tugata olmay zahiraga chiqishga majbur bo'lgan edim. Shifokorlar 10-15 kun maydonga chiqa olmasligimni ta'kidlashdi. Bu yoqda esa mavsum tugab bormoqda. Biz pandemiya tufayli salkam bir yil oilamizdan yiroqda bo'ldik. 11 oy uydan olisda yashash oson emas. Albatta tezroq uyga qaytishni istadim. Bosh murabbiy Baxtiyor Ashurmatovdan, o'ynay olmaydigan bo'lsam uyga ruxsat berishini so'radim. Murabbiyimiz meni to'g'ri tushundilar hamda Filip Rayevats ikkimizni ertaroq jamoani tark etishimizga ruxsat berdilar.

Men O'zbekistonda bo'lganimdan , “Qo'qon-1912” jamoasi safida to'p surganimdan juda baxtiyorman. Biz yil davomida ahil oila bo'ldik. Ajoyib mavsumni o'tkazdik. Jamoa rahbariyati, murabbiylar, futbolchilar va barcha klub a'zolariga minnatdorchilik bildiraman. Qo'qonda ajoyib muxlislar bor. Bunday fidoiy muxlislar ko'z o'ngida to'p surish kishiga olam-olam zavq beradi. Endi uyga borib biroz hordiq chiqaraman. Menda o'ylab ko'rish uchun vaqt bor. Nasib qilsa balkim kelgusi yilda yana Qo'qonda ko'risharmiz. Mavsumning so'nggi o'yinlarida jamoadoshlarimga omad tilayman. Yana bir bor barchaga rahmat aytaman – dedi Ivan Yosovich.

Manba: Qo'qon-1912 matbuot xizmati