Endi ular oramizda yo'q (Ramziy jamoa)

Stadion.uz vafot etgan futbol yulduzlaridan tashkil topgan eng kuchli ramziy jamoalardan birini e'tiboringizga havola etadi.

Darvozabon

Lev Yashin

Lev Yashin 1990 yilda 60 yoshida olamdan o'tdi. U bilan birgalikda deyarli butun era yakunlandi. Qahramonimiz shu kunga qadar «oltin to'p»ni qo'lga kiritgan eng yagona darvozabon sanaladi. Yashin birinchi bor o'tkazilgan Evropa Chempionatida g'alaba qozondi va o'z nomini tarixga abadiy yozib qoldirdi.

Himoyachilar

Bellini

Braziliya terma jamoasi o'zining birinchi chempionligini aynan Bellini sardorlik qilayotgan davrda qo'lga kiritgan edi. Uni boshqa davlatlardan yaxshi tanishmasada, o'z yurtida u chinakam qahramon! Aynan uning haykali «Marakana» stadioniga o'rnatilgan. Afsuski, Bellini 2014 yilda 88 yoshda olamdan o'tgan. U olamdan o'tganida Braziliyada 3 kun motam e'lon qilingan edi.

Bobbi Mur

Himoyachi,   sardor va JCh g'olibi. Mur 16 yil davomida «Vest Hem» sharafini himoya qilgan. Bundan tashqari, uning hisobida Angliya terma jamoasi safida o'tkazilgan 100 dan ortiq o'yinlar ham mavjud. U o'z zamonasining eng kuchli futbolchilaridan biri sifatida tilgan olinadi. Qahramonimiz bu hayotni erta tark etdi. U olamdan o'tganida endigina 50 yoshni qarshi olgan edi xolos.

Karlos Alberto

Braziliya terma jamoasining yana bir «oltin sardori» bilan tanishing. 1970 yilda bo'lib o'tgan JChdan so'ng, uni «Kapitan uchinchi» deb nomlashgan edi. Uning hisobida mingdan ortiq o'yinlar mavjud bo'lib, ularning barchasi «Santos» jamoasi libosida o'tkazilgan. Qahramonimiz butun futbolchilik faoliyati davomida 100 ga yaqin gol kiritgani e'tiborga molik. U 2016 yilda 72 yoshda olamdan o'tgan.

Gaetano Shiriea

Aynan 1989 yilda Italiya futbolida ham katta yo'qotish ro'y berdi desak, adashmagan bo'lamiz. Italiya himoyachilar maktabining eng a'lochilaridan biri bo'lgan Gaetano butsalarini mixga ilgach, oradan bir yil o'tib bu olamni tark etadi. «Yuventus» safida uzoq yillar to'p surgan futbolchi jamoa murabbiylar shtabiga ishga o'tadi. Jamoaning UEFA kubogidagi raqibi – «Gurnik»ning o'yinlarini tahlil qilish uchun Polshaga uchib kelgan futbolchi aynan polyaklar mamlakatida avtohalokat sababli vafot etadi. Turin super klubi afsonasini hali-hamon yodga olishadi. Hatto Italiyada uning nomi berilgan futbolchilar uchun har yili topshiradigan sovrin ham mavjud.

Yarim himoyachilar

Jorj Best

O'z davrining eng iqtidorli futbolchisi sanalgan Best alkogol va ayollar sababli erta futbol sahnasida tushib ketdi. Boz ustiga, uning butun sayyoramiz bo'ylab olib borgan faoliyati ham kutilganidek yorqin chiqqani yo'q. «Manchester Yunayted» safida «oltin to'p»ni qo'lga kiritgan qahramonimiz 2005 yilda 59 yoshda olamdan ko'z yumgan edi. Uni «qizil iblislar» muxlislari hali-hamon yaxshi xotiralar bilan esga olishadi.

Yohan Kroyf

Buyuk futbolchi va murabbiy. «Oltin to'p»ni naqd uch bor boshi uzra ko'targan afsona ham 2016 yilda futbol olamini butkul tark etadi. Shunday bo'lsada, u yaratgan futbol g'oyalari hali hamon tirik.

Diego Armando Maradona

Keling tan olaylik, Diego uzoq yashash uchun kerakli ko'rsatmalarga amal qilgani yo'q. Uning hayot tarzi shundan dalolat edi, biroq uning o'limdan so'ng Pep juda chiroyli iqtibosni keltirdi:

«Sen o'z hayotingda nimalarni amalga oshirganing muhim emas, muhimi o'zgalarning hayotida amalga oshirgan ishing!»

Maradonaning ketishi futbol haqida yozilgan ulkan kitobning butun bir boshli bobining yo'q bo'lib qolgani bilan barobar. Kitobning bu bobida futbolning san'at darajasiga chiqqani haqida yozilgan edi. Demak, Maradona abadiy! Sababi, san'at doimo abadiy qoladi.

Hujumchilar

Alfredo Di Stifano

Bugungi avlod muxlislari bu futbolchi haqida etarlicha ma'lumotga ega emas, ammo uning «Real» jamoasi mashhurligi uchun hissasi juda ulkan. 8 ta chempionlik va bir necha Evropa Chempionlar kubogidagi oltin medallar sababi Madrid klubi ortda qolgan asrning eng qudratli jamoasi deb tan olindi. Bunda, afsonaviy Alfredoning tutgan o'rni beqiyos. 2014 yilda qahramonimiz 88 yoshda olamdan o'tgan.

Garrincha

Ikki xil uzunlikda oyoqlar Garrinchaga ikki bor JCh g'olibi bo'lishi uchun to'sqinlik qilgani yo'q. Uni Braziliyada Peledan ham iqtidorliroq hisoblashar edi, ammo ichkilik uni tamom qildi. Shu bois, u 1983 yilda 49 yoshda kasallikdan vafot etadi. Afsus…

Eysebio

Lev Yashindan boshladik va uning eng yaqin do'stlaridan biri – Eysebio bilan yakunlaymiz. «Qora olmos» laqabli futbolchini ismini hali-hamon ko'plab maqolalarda uchratib qolasiz. «Benfika» jamoasining barcha zamonlardagi eng yaxshi futbolchisi sanalgan hujumchi 440 ta o'yinda klub uchun 473 ta gol kiritib rekord o'rnatganidan xabaringiz bormi? Portugaliya terma jamoasiga qarshi 1966 yildagi mundialning uchinchi o'rin uchun o'yini chog'idagi bir voqea bilan maqolaga yakun yasaymiz. O'sha bahsda, Eysebio yaqin do'sti Lev Yashinning darvozasini ishg'ol qiladi. Golni nishonlash o'rniga, do'stining oldiga keladi va quloqlariga sekingina «uzur do'stim, bu shunchaki futbol» degancha ortga qaytib ketadi.