Baxtiyor Ashurmatov: "Oxirgi o'yinlarda vaziyatlardan foydalanishda oqsayapmiz"

Superliga 24-tur doirasidagi “Qo'qon-1912” – “Lokomotiv” uchrashuvidan keyingi matbuot anjumanining ikkinchi qismida jamoamiz bosh murabbiyi Baxtiyor Ashurmatov qatnashdi.

- Afsuski, oxirgi o'yinlarda vaziyatlardan foydalanishda oqsayapmiz. Ko'plab vaziyatlar yaratyapmiz, biroq gol ura olmayapmiz. Tabiiyiki, gol urmagach, g'alaba qozonib bo'lmaydi. Bugun balki tarkib tanlashda biroz adashdim deb o'ylayman. Birinchi bo'limda maydon markazini raqibga berib qo'ydik. Himoyada ham xatolarga yo'l qo'ydik. Gol o'tkazvorganimizdan so'ng yigitlar hisobni tenglashtirish va g'alaba qozonish uchun astoydil harakat qildilar. Biroq yaratilgan vaziyatlardan gollarni kirita olmaganimiz bizga qimmatga tushdi. Shunday bo'lsa-da, futbolchilarimiz maydonda borlarini berib o'ynashmoqda. Buning uchun ularga rahmat aytaman. Agar yigitlar shu tarzda o'ynashsa chempionatni munosib tarzda yakunlay olamiz.
Bugun achinib ketganim shu bo'ldiki, mavsum davomida qilgan mehnatlarimiz mag'lubiyat tufayli kutilgan natijani bermasligi mumkin.

“Lokomotiv”ni bugungi g'alaba bilan tabriklayman. “Paxtakor” bilan o'yinda afsuski, Avaz Mamatxo'jaevni maydonga tushira olmagan edik. Murod Xolmuhammedov qanotda yaxshi harakat qilgandi. Bugun ham Xolmuhammedov maydonda katta hajmdagi ishni bajarib berdi. O'z maydonimizda to'p surganimiz sababli bugun hujumkor bo'lgan yarim himoyachi Muzaffar Muzaffarovni maydonga tushirgandim.