Asror Aliqulov: «Bu durang «Dinamo»ni ham, «Sho'rtan»ni ham qoniqtirmaydi»

Pro liga 17-turi doirasidagi «Dinamo» - «Sho'rtan» (1:1) o'yinidan keyin mehmonlar bosh murabbiyi Asror Aliqulov o'yin haqida to'xtaldi.

«Bugungi bahsdagi durang ikki tomon uchun ham bir ochko emas, 2 ochko yo'qotilgan bahs sifatida qoladi. To'g'ri, «Dinamo» 2-bo'limda o'yinda ancha ustunlik qildi, ammo biz ham birinchi taymda gol o'tkazib yuborishimizga qaramay, hisobni tenglashtirdik, keyin esa yaqqol golli vaziyatdan foydalana olmadik. Shu bois, faqat «Dinamo» emas, biz ham muhim ochkolarni boy berdik. Futbolchilarimiz texnik va jismoniy jihatdan kuchliroq bo'lganda ikkinchi bo'limda ham gol kiritishimiz mumkin edi. Samarqand klubi ham ikkinchi bo'limda uzun paslar, standart vaziyatlardan bo'ydor hujumchi va himoyachilari evaziga g'alaba golini urishga intildi. «Dinamo» bilan mavsumda 3-marta ro'baro' kelganimiz uchun o'yinchilarimiz raqibning bu uslubiga tayyor edi.

Tarkib borasida muammolarimiz ko'p. Menimcha, to'rtlikdagi uch klubdan ko'ra aynan bizda jarohat bo'yicha yo'qotishlarimiz ko'proq. Shunga qaramay, bor imkoniyatimizdan foydalanib jamoalarga qarshilik ko'rsatayapmiz. Katta mashaqqat evaziga durang qayd etdik. Ammo bu durang ikki jamoaning ham foydasiga ishlamaydi.

Jamoamiz jismoniy jihatdan ustun emasligi bois, buni imkonqadar taktik jihat qoplashga urinayapmiz. Aytaylik, «Dinamo»da bo'ydor va baquvvat himoyachilar ko'p. Shu bois ularga qarshi uzun paslar bilan o'ynashdan foyda bo'lmaydi. Natijada qisqa paslar va qarshi hujumda to'p surdik. «Dinamo» bilan o'tgan uch o'yinimizda ham hisobda ortda qolib, raqibning ustunligiga qaramay farqni yo'qqa chiqara olganimiz taktik jihatdan to'g'ri o'ynashimiz tufayli bo'lishi mumkin.

Ikki o'yin mehmonda, yana bitta bahsni o'zimizda o'tkazamiz. Tarkibda o'zgarishlar qilsak-da, hammasi yigitlarimizga bog'liq. Muhim ochkolarni qo'lga kirita olsak, Superliga yo'llanmasi masalasini hal qilishimiz mumkin. Hammasi yigitlarimizning qo'lida, biz oxirigacha kurash olib boramiz», - deydi «Sho'rtan» bosh murabbiyi Asror Aliqulov.

Usmon Ibodov suhbatlashdi.