Shohnazar Norbekov:”Noyabr oyining so'ngi kunlarida mashg'ulotlarga kirishaman”

Coca Cola superligasining 21-turidan o'rin olgan “Qo'qon-1912” – AGMK uchrashuvida jarohat olgan Shohnazar Norbekovning bugungi kundagi ahvoli, davolanish jarayonlari qay tarzda o'tayotganligi bilan qiziqdik.

-Shohnazar sog'liklaringiz yaxshimi? Davolanish jarayonlari qanday bo'lyapti ?

- Assalomu alaykum. Sog'ligim xozirgi kunda ancha yaxshi. O'zimni juda yaxshi his qilyapman. Qiyin kunlar ortda qoldi deb o'ylayman. Xudoga shukr , barchasi shifokorlarimiz o'ylaganidan ko'ra ancha yaxshi o'tyapti. Davolanish jarayonlarini  Toshkent shahridagi klinikalarning birida  davom  ettirmoqdaman. Mutaxassis shifokorlar  tavsiya qilgan dori-darmonlarni qabul qilyapman.

-Shifokorlar sizga qachon mashg'ulotlarga qaytishingiz mumkinligini aytishdimi?

- Avvalo hammasi Ollohdan. Shifokorlarimiz davolanish jarayonlari yaxshi ketayotganidan mamnunlar. Agar ularning tavsiyalariga to'liq amal qilib , davolanish jarayonlarini davom ettirsam, mashg'ulotlarga qaytishim uzoqqa cho'zilmasligini aytishmoqda. Shifokorlarimiz 15 oktyabrda qayta ko'rikdan o'tishimni aytishgan. O'sha ko'rikdan so'ng mashg'ulotlarga qaytishim borasida ancha aniqlik kiritiladi menimcha. Noyabr oyining oxirgi kunlariga borib mashg'ulotlarga ruxsat berib qolishsa kerak. Ochig'i o'zim ham juda sog'indim. Uyda o'tirish qiyin ekan. Jamoamiz o'yinlarini televizor orqali kuzatish esa undanam qiyin bo'lyapti. Yaxshiyam jamoadoshlarim, do'stlarim xabar olib turishibdi. Barchalariga rahmat.

-Sizning va Suhrob Berdievning sog'liklaringizni so'rab bizga har kuni muxlislar murojaat qilib turishibdi. Barchalari sizlarga yaratgandan shifo so'rashmoqda.

- Hammalariga rahmat. Meni o'zimga ham  juda ko'p insonlar telefon qilib ahvolimni so'rashmoqda. Jamoamiz rahbarlariga, murabbiylarimiz, barcha klubimiz xodimlariga hamda hurmatli  muxlislarimizga shu fursatdan foydalanib o'zimni minnatdorchiligimni bildirib o'tmoqchiman. Yaqin kunlarda yana futbol maydonlarida uchrashamiz deb umid qilaman. Xudo xoxlasa yana chiroyli o'yinlarimiz va g'alabalarimiz bilan muxlislarimizni xursand qilamiz deb umid qilaman.