«Inter» prezidenti klublarni terma jamoa o'yinlarini boykot qilishga chaqirdi

«Inter» prezidenti Juzeppe Marotta klublarni milliy terma jamoalar o'yinlarini boykot qilishga chaqirdi.

"Bu adolatsiz vaziyat. Markazlashgan tizimning yo'qligi bizni boshi berk ko'chaga etaklaydi. Bunaqada har bir mahalliy sog'liqni saqlash tashkiloti klublar boshqaruvida asosiy tashkilotga aylanadi. Bu holatda terma jamoalar o'yinini boykot qilish kerak deb o'ylayman. Ha, jiddiy aytyapman.

Futbol davom etishi kerak, bu hammani qanoatlantiradi, bu borada hukumat bizga yordam berishi va ma'lum qoidalarni o'rnatishi kerak. Agar bunga vaqt kerak bo'lsa, men 15 kunlik tanaffus berilishini taklif qilaman. Barcha uchun barobar va aniq qoidalar o'rnatilgach, davom etamiz. Sog'liqni saqlash borasidagi qoidalar har bir hududda boshqacha ekanini bema'nilik deb bilaman", — dedi Juzeppe Marotta.

Roberto Manchini Italiya terma jamoasi yig'iniga bir yo'la 41 nafar futbolchini jalb qilgan. Italiya 11 noyabr kuni Estoniyaga qarshi o'rtoqlik o'yinini o'tkazadi. Keyinchalik Millatlar Ligasi doirasida 15 noyabrda Polsha, 18 noyabr kuni esa Bosniya va Gersegovinaga qarshi uchrashuvda maydonga tushadi.