Vadim Abramov: «Paxtakor» chempionlikni bizning maydonda nishonlamasligini istagandik»

Coca Cola Superliganing 18-turidan o'rin olgan «Bunyodkor» - «Paxtakor» (3:2) uchrashuvidan keyin o'tkazilgan matbuot anjumanining ikkinchi qismida mezbonlar ustozi Vadim Abramov ishtirok etdi.

"O'ylashimcha, yomon o'yin bo'lgani yo'q. Qolaversa, shunday bahsni muxlislar ham bevosita stadionda kuzatgani yaxshi bo'ldi. Fikrimcha, bellashuv ishqibozlarga ma'qul keldi. Biz uchrashuvni ishonchli boshladik, lekin birinchi goldan keyin negadir ko'proq himoyani o'yladik. To'g'ri, «Paxtakor» kuchli raqib, tarkibdagi futbolchilar tajriba borasida ustun. Qaysidir ma'noda omadimiz ham keldi. Birinchi davradagi bahsda hamma gol bizning darvozamizdan joy olgandi. Bu safar aksi bo'ldi. Futbolda shunaqa. Lekin ikkita ko'p bo'lib turib nazoratni o'z qo'limizga ololmadik. Nazarimda bu hissiyotlar bilan bog'liq.

Butun mavsum davomida bunday o'ynab bo'lmaydi. «Paxtakor» printsipial raqib bo'lgani uchun barcha futbolchilar o'zini ko'rsatishga harakat qildi, borini berdi. Qolaversa, birinchi davrada alamli tarzda yirik hisobda yutqazgandik. Yigitlar o'sha mag'lubiyatga loyiq emasligimizni isbotlash uchun ham bugun o'ynashdi. Shuningdek, bugun «Paxtakor» chempion bo'lishi kerak edi. Yigitlar bilan o'yindan oldin «Paxtakor» chempionlikni bizning maydonda nishonlamasliklari kerakligini gaplashgandik, niyatimizga etdik", — dedi Abramov.