Baxtiyor Ashurmatov: «Uzr, final Qarshida bo'ladigan bo'ldi»

"Qo'qon-1912" jamoasining bosh murabbiyi Baxtiyor Ashurmatov "Sport" telekanalining 29-oktyabr kuni bo'lib o'tgan "Bizning futbol" ko'rsatuvida "Nasaf"ga qarshi o'yin haqida o'z fikrlarini bayon etdi.

"Men AGMKga qarshi o'yindan oldin futbolchilarimga bugungi o'yin biz uchun final o'yinidek bo'ladi. Biz maydonga oxirgi o'yinga chiqqandek chiqishimiz kerak deb tayinlagandim. O'yinda g'alaba qozonganimizdan so'ng, "Nasaf"ga qarshi tayyorgarlik mashg'ulotlarida yigitlarga "Uzr, ukalar, kechagi o'yin yarim final ekan, final Qarshida bo'ladigan bo'ldi", dedim. Futbol jamoasining hayoti shunaqa o'yindan-o'yingacha, bugungi o'yin eng muhim deb o'ylaysiz, g'alaba qozongach esa keyingi o'yin eng muhimdek tuyulaveradi.

"Nasaf" o'z maydonida judayam tezkor, xujumda yuqori pressing qo'llaydigan juda xavfli jamoa. Biz ham mana shunday o'yinga tayyorgarlik ko'rib kelganmiz. O'ylaymanki, yigitlar bugun ham maydonda g'alaba uchun borlarini berib o'ynashadi", — dedi Ashurmatov.