Ro'ziqul Berdiev: "G'alaba qozonish hamisha yoqimli"

Superliga 21-turidan o'rin olgan "Metallurg" - "Nasaf"(0:2) uchrashuvidan so'ng mehmonlar bosh murabbiyi Ro'ziqul Berdiev fikrlarini bildirib o'tdi.

"Kuchli raqibning maydonida g'alaba qozonish hamisha yoqimli. Bugun maydonda ham kurashdik, ham futbol o'ynadik. "Metallurg" jamoasini yaxshi bilar edik, kurashuvchan yaxshi shakllangan jamoa hisoblanadi. Ko'proq uzun paslar bilan qarshi hujumlarda yaxshi o'ynaydi. Biz shunga tayyorlangandik. Himoyada ham tartibli harakat qildik. Shuning evaziga raqibga golli vaziyatlar yaratishiga imkoniyat qoldirmadik. Hujumda o'z vaziyatimizni kutdik va imkoniyatimizdan unumli foydalandik. "Metallurg" o'z uyida ko'p jamoalarni shoshirib qo'ygan holda g'alaba qozongan jamoa edi. Shuningdek, raqibimiz boshqa jamoalarga qaraganda jismoniy jihatdan juda yaxshi tayyorgarlikka ega. Yigitlarga ko'proq kurashlarda yutqazmaslikni ta'kidlagandik.

Shuningdek, "Metallurg" jamoasi bizga qaraganda turlar oralig'ida kamroq vaqt dam oldi. Bo'lim oxiriga kelib ularning charchashini biz kutgandik. Ular tetik paytida biz himoyalanishimiz va imkoniyatimizni kutishimiz kerak edi. Ko'rgan bo'lsangiz so'nggi o'n besh daqiqalikda raqib charchadi. Biz esa bosimni oshirdik va yutiqqa ega bo'ldik. Futbolchilarga rahmat aytaman. Muxlislarni g'alaba bilan tabriklayman. Bugun barchamiz birgalikda g'alaba qozondik", — deydi Ro'ziqul Berdiev.