«The Sun» Pogbadan uzr so'radi. Pol terma jamoadan ketmaydi

Britaniyaning "The Sun" nashri «Manchester Yunayted» klubi yarim himoyachisi Pol Pogba haqida haqiqatga mos kelmaydigan ma'lumot tarqatgani uchun uzr so'radi.

Nashr 26 oktyabr kuni islomga e'tiqod qiladigan Pogba Frantsiya prezidenti Makronning musulmonlar haqidagi so'zlariga norozilik belgisi sifatida Frantsiya terma jamoasidan o'ynashdan bosh tortgani haqida xabar tarqatdi.

Oradan bir necha soat vaqt o'tib, Pogbaning o'zi ushbu ma'lumotni rad qildi va nashrni sudga berishga va'da berdi. "The Sun" esa Tvitter orqali futbolchidan uzr so'radi.

«Pol Pogba Frantsiya terma jamoasidagi faoliyatini yakunlashga qaror qilgani haqida xabar bergan edik. Biz buni sport saytiga asoslanib e'lon qildik. Bu haqda "The Mirror", "Mail Online" va boshqa saytlar ham xabar tarqatishdi.

Pol Pogba esa ushbu ma'lumotni inkor qildi va biz ma'lumotni to'ldirdik. Yuzaga keltirilgan noqulayliklar uchun uzr so'raymiz», — deyiladi "The Sun" tarqatgan bayonotda.