El-klasiko! «Real» Kataloniyada g'alaba qozondi

Ispaniya chempionatining 7-turi doirasida «Barselona» va «Real» klublari o'rtasida «Kamp Nou»da bo'lib o'tgan o'yin hozirgina yakuniga etdi.

Uchrashuvda tezkor gol urildi. Benzemaning uzatmasidan keyin Valverde jarima maydoniga kirdi va yakkama-yakka vaziyatda Netoni dog'da qoldirdi.

"Barsa" esa juda tez javob qaytardi. Oradan 3 daqiqa o'tib Albaning uzatmasidan keyin Fati yaqin masofadan to'pni darvozaga joylab qo'ydi.

Birinchi bo'lim o'rtalarida madridliklar oldinga o'tib olish uchun yaxshi imkoniyatga ega bo'ldi. Ammo Benzemaning qulay vaziyatda yo'llagan zarbani Neto qaytarishga muvaffaq bo'ldi.

Ikkinchi bo'limni kataloniyaliklar ancha faol boshlashdi. Fatining uzatmasidan keyin Koutino yaqin masofadan bosh bilan zarba berdi. Ammo to'p ustun yonginasidan o'tib ketdi. Oradan ko'p o'tmasdan VAR aralashadigan vaziyat yuzaga keldi. Jarima zarbasi amalga oshirilgan paytda Langle jarima maydoni ichida Ramosning futbolkasidan tortdi. "Real" sardori yiqilish imkoniyatidan unumli foydalandi. Referi videoyordamchi bilan uzoq maslahatlashdi, oxiri o'zi borib vaziyatni kuzatdi va penalti belgiladi. Ramosning o'zi penaltidan unumli foydalanib, jamoasini oldinga olib chiqdi.

O'yinning so'nggi daqiqasida esa "Qirollik klubi" hujumga tashlangan "Barsa"ni qarshi hujumda jazoladi. Darvozabonning xatosidan so'ng to'pni egallagan Modrich bo'sh qolgan darvozani ishg'ol qildi.

Shu tariqa, "Real" ketma-ket ikkita mag'lubiyatdan so'ng g'alaba qozonishga muvaffaq bo'ldi.

Ispaniya La ligasi, 7-tur
Barselona – Real Madrid 1:3 (vtoroy taym)
Gollar: 0:1 – 5 Valverde, 1:1 – 8 Fati, 1:2 – 63, penalti Ramos, 1:3 – 90 Modrich.
Barselona – Neto, Pike, Langle, Dest, Alba (Breytueyt, 87), Buskets (Dembele, 82), de Yong, Fati (Grizmann, 81), Koutino, Pedri (Trinkau, 81), Messi.
Real Madrid – Kurtua, Ramos, Mendi, Varan, Nacho (Vaskes, 43), Valverde (Modrich, 69), Kazemiro, Vinisius Junior, Kroos, Asensio (Rodrigo, 81), Benzema.
Ogohlantirishlar: Kazemiro (19), Langle (29), Nacho (37), Alba (62), Messi (90).