Pike: "Nima uchun Valverdeni haydashganini haligacha tushunmayman"

Kataloniyaning «Barselona» klubi himoyachisi Jerar Pike jamoaning sobiq bosh murabbiyi Ernesto Valverdening nima sababdan egallab turgan lavozimidan chetlatilganini tushunmasligini aytib o'tdi.

«Men haligacha nima uchun Ernesto Valverdeni iste'foga chiqarishganiga tushunmayman. Qolaversa, bu hodisa mavsum o'rtasida ro'y berdi. Uning oxirigacha ishlashiga imkoniyat berishmadi. Bu noto'g'ri. Uning qo'l ostida La Ligada peshqadam edik, ikki marta Ispaniya chempionatida g'olib chiqdik.

Klub bunday bo'shatishlarni amalga oshirganda, afsonalarga bo'lgan munosabat aniq bo'ladi. Valverdedek insonlar «Barselona» klubi strukturasida ishlashlari shart. Gvardiola, Xavi, Puyol va Valdeslar ham. Ularning "Barselona" rivoji uchun ishlamayotgani katta muammo deb o'ylayman», — dedi Jerar Pike.