«Real»ni mag'lub etgan «Shaxtyor» bosh murabbiyi iste'fodan qutulib qoldi

Ukrainalik futbol jurnalisti Igor Tsiganik o'zining mualliflik dasturi orqali «Shaxtyor» bosh murabbiyi Luish Kashtru iste'foga yaqin bo'lganini aytib o'tdi.

«Real» ustidan qozonilgan g'alaba Luish Kashtru uchun juda muhim ahamiyatga ega. U ancha vaqtgacha ikkalanib yurdi: natija uchun yoshi katta futbolchilardan foydalanish kerakmi yoki yoshlarga ishonch bildirish? Hozirda esa shubhaga o'rin qolmadi — «Shaxtyor»ning kelajagi bor.

Avvalgi dasturlarimdan birida men «Shaxtyor»ning saviyasini baholay olmasligimni aytgan edim. Futbolchilar maydonga chiqishdi va o'zlarini ko'rsatishdi. Endi esa barqarorlik namoyish etish kerak.

Kashtru qo'rqmadi, yoshlarni maydonga tushirdi. Bu futbolchilar qanchalik barqaror o'yin namoyish etishadi — asosiy masala shunda.

Sizga ochig'ini aytaman: Kashtru iste'fo arafasida turgan edi. «Real»ga qarshi o'yin uni qutqarib qoldi. O'ylashimcha, u Chempionlar ligasi oxirigacha ishlaydi», — dedi jurnalist.