Pro liga. «Neftchi» Zominda g'alaba qozonib, peshqadamga aylandi

Pro liganing 13-turida safarda autsayder "Zomin" klubi  bilan bahs yuritgan  "Neftchi", ishonchli g'alabani qo'lga kiritib, turnir jadvalida birinchi pog'onaga ko'tarilib oldi.

Bugungi bellashuvda birinchi xavfli vaziyat 6-daqiqada ro'y berdi. Mezbonlarning xujumchisi Jonibek Ko'chimov darvozamiz tomon yo'llagan zarbasi kuchsiz chiqdi. 11-daqiqada esa navbat mehmonlarga o'tdi va chap qanotdan uyushtirilgan hujum gol bilan yakunlandi. Dostonbek Toshmatov oshirib berilgan to'pni darvozaga aniq yo'lladi — 0:1.

Goldan ruhlangan farg'onaliklar 23-daqiqada hisobni yanada oshirishdi. Bu gal chap qanotdan yorib kirgan yarim himoyachi Rustamjon Abduhamidov uzoqdan kuchli zarba berib, mezbonlar darvozabonini ojiz qoldirdi — 0:2.

Vaziyatni o'zgartirish maqsadida zominliklar tomonidan uyushtirilgan hujumlarning birida to'p jarima maydoni ichida "Neftchi" futbolchisining qo'liga tegdi va bosh hakam penalti belgiladi. Dilshod Xushbakov penaltini aniq bajarib, hisobdagi farqni qisqartirdi — 1:2. Bu natija birinchi bo'lim oxirigacha o'zgarmadi.

Ikkinchi bo'limda katta kuch bilan oldinga tashlangan "Zomin" 62-daqiqaga kelib muvozanatni tikladilar. Bu safar mezbonlardan Otabek Ahmadjonov golga mualliflik qildi.

Lekin g'alaba ilinjida maydonga tushgan "Neftchi" 74-daqiqada hisobda oldinga olib chiqdi. Jamoa to'purari Dostonbek Toshmatov gol urib, o'yindagi dublga erishdi — 2:3.

O'yin taqdirini hal qilgan gol esa 83-daqiqada kiritildi. Bu safar Dostonbek Toshmatov, Rustamjon Abduhamidov va Mansur Saidovlar  uchligi chiroyli kombinatsiya uyushtirishib, to'rtinchi golni darvozaga joylab qo'yishdi — 2:4.

Shunday qilib, ertaga davom ettiriladigan 13-tur o'yinlari oldidan "Neftchi" 27 ochko to'plab birinchi pog'onaga ko'tarilib oldi.

Pro liga 13-tur
“Zomin” - “Neftchi” - 2:4 (1:2)
Gollar: Dostonbek Toshmatov, 11 (0-1), Rustamjon Abduxamidov, 23 (0-2), Dilshod Xushbaqov pen., 28 (1-2), Otabek Axmadjonov 62' (2-2), Dostonbek Toshmatov (2-3) 74', Mansur Saidov (2-4) 83'

"Neftchi" matbuot xizmati.