Baxtiyor Hamidullaev 2:6dan so'ng: "O'yinga yaxshi tayyorgarlik olib borgandik"

Superliganing 20-tur doirasida bo'lib o'tgan "Bunyodkor" hamda "Andijon" jamoalari o'rtasidagi uchrashuvdan keyin o'tkazilgan matbuot anjumanining birinchi qismida mehmonlar bosh murabbiyi Baxtiyor Hamidullaev ishtirok etdi.

- O'yin haqida gapiradigan bo'lsam, o'yin boshida markaziy himoyachilarimizning qo'pol xatolaridan so'ng gollar o'tkazib yubordik. Mana shu gollardan so'ng, futbolchilar ruhan sinib qoldi va o'zlariga kela olmadi. Lekin o'yin bu darajada yirik hisobda yakunlanishini kutmagandim. Biz ham jiddiy tayyorgarlik ko'rgandim. Lekin, yuqorida aytib o'tganimdek, ikkita gol yigitlarni "sindirib" qo'ydi.

- O'tkazib yuborilgan ikkita goldan keyin "Andijon" javob qaytarishga erishdi...

- Ha, javob berishga erishdik, lekin... Yigitlarni o'ziga beriladigan savollar juda ko'p. Bugungi o'yinni qayta ko'rib chiqamiz. Ko'plab futbolchilar bilan qattiq gaplashib olamiz shekilli. Futbolni bunday o'ynab bo'lmaydi, bu eski zamonni futboli. Oldingi "Andijon"ni futboli futbolchilarning miyalariga o'rnashib qolgan shekilli. Biroq, avvalgi o'yinlarda mana shu fikrni yigitlarni miyalaridan chiqarib yuborishga harakat qilayotgandik, ammo, hozir yana o'sha futbolni o'ynashni boshlashdi.

- Bugun "Andijon"ni kuni emas ekan desak bo'ladimi?

- Shunaqa desak ham bo'ladi. Ikkinchi darvozabonimizni ham maydonga tushirgandik, lekin u ham jarohat oldi va uning o'rniga boshqa futbolchimiz darvozada turdi.

- Eldor Adhamov nima sababdan almashtirildi?

- O'tkazib yuborilgan gollarda uning ham aybi bor. O'tkazilgan uchta golni darvozabon qaytarsa bo'ladigan vaziyatda edi. Berilgan zarbalar u darajada kuchli emasdi.

- Axrorovning jarohati qanday?

- Asosiysi oyog'i sinmagan.

- Jamoangizni "Bunyodkor"ning pressinglarida bardosh bermadi?

- O'zi o'ylab ko'rsangiz bugungi o'yin uchun tayyorgarlik olib borish uchun "Bunyodkor" bizga qaraganda bir kun kam dam oldi. Bizda hammasi joy-joyida edi. O'yin boshidagi ikkita gol ruhan sindirib qo'ydi.