La liga. «Barselona» ham «el-klasiko» oldidan yutqazdi

Ispaniya chempionatining 6-turi doirasida "Barselona" klubi ham, "Real"ning ortidan, mag'lubiyatga uchradi. Kataloniyaliklar Madridda "Xetafe" mehmoni bo'lib, kichik hisobda yutqazishdi.

Mezbonlar butun o'yin davomida "ko'k-anorranglilar"ga nisbatan jiddiy pressing ishlatishdi va katta ishtiyoq bilan to'p tepishdi. Shunga qaramay, hisobni "Barsa" ochishga yaqin keldi. Dastlab bahsning 20-daqiqasida Destning uzatmasidan keyin Messi yo'llagan zarba ustunga tegib qaytgan bo'lsa, oradan 10 daqiqa o'tib Antuan Grizmann raqib darvozaboni bilan yakkama-yakka vaziyatga chiqib bordi va noaniq zarba yo'lladi.

Uchrashuvning 55-daqiqasida esa Frenki de Yong xatoga yo'l qo'yib, o'z jarima maydoni ichida "Xetafe" futbolchisini yiqitdi. Belgilangan penaltini Xayme Mata aniq amalga oshirib, hisobni ochdi.

O'yin so'ngida "Barselona" o'yinni qutqarib qolishga harakat qildi. Bir vaziyatda qanotdan etkazilgan uzatmani "Xetafe" himoyachisi o'z darvozasiga joylab qo'yishiga oz qoldi — to'p to'singa tegib qaytdi. Messining 15 metrlardan yo'llagan zarbasiga esa biroz aniqlik etishmadi.

Aksincha, Kucho "Barsa" posboni bilan birga-bir vaziyatga chiqib, undan samarali foydalanganida, o'yinga ertaroq nuqta qo'yardi. Shunga qaramay, "Xetafe" o'z uyida "Barselona"ni mag'lub etdi va o'z ochkolarini 10taga etkazib, peshqadamlar safiga qo'shildi.

Ispaniya La ligasi, 6-tur
Xetafe – Barselona 1:0 (0:0, 1:0)
Gol:  1:0 – 56, penalti Mata.
Xetafe – Soriya, Olivera, Kabako, Suares, Nom, Arambarri, Kukurelya, Maksimovich (Molexo, 90), Jene, Mata (Unal, 71), Ernandes (Timor, 89).
Barselona – Neto, Dest, Serdji Roberto (Puch, 87), Langle, Pike, de Yong (Breytueyt, 80), Buskets, Pedri (Koutino, 62), Dembele (Fati, 62), Grizmann (Trinkau, 80), Messi.
Ogohlantirishlar: Pike (24), Mata (27), Kabako (28), Serdji Roberto (41), Nom (73), Olivera (90), Dest (90).

Manba: www.stadion.uz.