Botir Qoraev: "Bunyodkor" bilan o'yindan keyin futbolchilarimizda pasayish kuzatildi"

Superliganing 19-tur doirasida bo'lib o'tgan Mash'al" hamda AGMK jamoalari o'rtasidagi uchrashuvdan keyingi tashkil etilgan matbuot anjumanida "Mash'al" jamoasi yordamchi murabbiyi Botir Qoraev ishtirok etdi.

- Avvalombor, assalomu alaykum. Bugun Dilyaver Vanievning betobligi sababli, matbuot anjumanida o'zim ishtirok etyapman. Bugungi o'yin haqida nima deyish mumkin? AGKMK - tajribali jamoa hisoblanadi. Ular bekorga turnir jadvalining ikkinchi pog'onasini band etib turishmayapti. Bugungi uchrashuv qiyin bo'lishini bilgandik. O'tkazib yuborilgan birinchi gol o'yinga katta ta'sir ko'rsatdi, deb o'ylayman. Raqiblarimiz birinchi golini kiritishda o'zimiz yaqqol xatoga yo'l qo'ydik. Birinchi o'tkazib yuborilgan golda Ubaydullaev xatoga yo'l qo'ydi. Bizda ham vaziyatlar bo'ldi, birinchi bo'limning o'zida ikki marta golga tortadigan vaziyat sodir etgandik, biroq bundan foydalana olmadik. Raqibning kiritgan ikkinchi golida darvozabonimizga nisbatan qo'pollik qilingandek ko'rindi. Buni o'yindan keyin albatta ko'rib chiqamiz.

- Jamoa beshinchi marotaba mag'lubiyatga uchramoqda.

- Albatta, qiyin besh marotaba mag'lubiyatga uchrash. Jamoamiz bu yil Superligaga yo'l oldi. Tarkibimizda Superligada ilk marotaba o'ynayotgan futbolchilar ko'p. Shunday bo'lsada, har bir o'yinda g'alaba qozonish uchun maydonga chiqyapmiz. O'ylaymanki, jamoamiz yomon o'yin ko'rsatayotgani yo'q. "Qizilqum"ga qarshi bahsda ham 4-5 ta vaziyat sodir etdik, "Surxon"ga qarshi o'yinda kamida ettita golli vaziyatga ega bo'ldik. To'g'ri, "Nasaf"ga qarshi o'yinda unchalik yaxshi harakat qila olmadik. Ammo, bugun yigitlar yomon o'ynagani yo'q. Bugungi o'yindagi mag'lubiyatni unutib, "Qo'qon-1912" jamoasiga qarshi bahsga tayyorgarlik ko'ramiz.

- Jamoaning beshta mag'lubiyatidan keyin murabbiylar shtabida o'zgarish bo'lishi mumkinmi?

- Iste'fo borasida men ham narsa deya olmayman, buni klub rahbarlari hal qiladi. Biz o'z ustimizda ishlashda davom etyapmiz, uchrashuvlarda etarlicha vaziyatlarga ega bo'lyapmiz. Agar jamoa o'ynamayotgan bo'lsa, buni tushunsa bo'ladi. "Bunyodkor"ga qarshi o'yinda bir kishi kam bo'lib qolgan bo'lsakda, yaxshi o'yin ko'rsatgandik. Aynan shu o'yindan keyin futbolchilarda pasayish kuzatildi, mana shu o'yindan keyin jamoa o'ziga kela olmayapti.

- Uchrashuv mobaynida hakamlarga e'tiroz bildirganingizni kuzatdik...

- O'yin davomida hissiyot bo'ladi. Hakamlarni ishini muhokama qilishga bizni haqqimiz yo'q. Ularni ishini ko'rib chiqadigan qo'mita bor. O'yin paytida futbolchilar ham, murabbiylar ham hissiyotga berilib ketadi.

- Zahiradan chiqqan futbolchilar o'yinni kuchaytira olmadi.

- Haqiqatdan ham, bugun zahiradan maydonga tushgan futbolchilar o'yinni kuchaytira olmadi. Meliev harakat qildi, lekin kuchi etmadi. Kamchiliklarni bartaraf etishda davom etamiz.