Odil Ahmedov to'liq harakat qilgan o'yinda «Tyantszin Teda» mavsumdagi ilk g'alabasini qo'lga kiritdi

Xitoy chempionati doirasida «Tyantszin Teda» 16 oktyabr, juma kuni «Shenchjen»ni qabul qildi.

Ligada jon saqlab qolish uchun o'tkazilayotgan uchrashuvlarning ilk bahsida «Tyantszin Teda» g'alabaga erishdi. Ganalik legioner Frenk Achimpong tomonidan kiritilgan ikki gol maydon egalariga g'alaba keltirdi.

Mazkur o'yinda o'zbekistonlik yarim himoyachi Odil Ahmedov to'liq harakat qildi.

Shu tariqa «Tyantszin Teda» 2020 yilgi mavsumdagi ilk g'alabasini qo'lga kiritdi. Jamoalar o'rtasidagi javob bahsi 21 oktyabr kuni bo'lib o'tadi.

Ma'lumot uchun, Xitoy Superligasi koronavirus pandemiyasi sabab 2020 yilda ikki guruhga bo'lingan holda o'tkazildi. Guruhlarda dastlabki to'rt o'rinni qo'lga kiritgan jamoalar chempionlik uchun pley-off  tizimida bahs olib  boradi. Quyidagi jamoalar esa xuddi shu tizimda ligada jon saqlab qolish uchun kurashadi.

Eslatib o'tamiz, Ahmedov jamoasi 2020 yilgi mavsumning 14 o'yinida 3 ochko to'plab, B guruhida so'nggi, 8-o'rinni egalladi. «Shenchjen» esa 17 ochko bilan A Guruhida 5-pog'onadan joy oldi.

Xitoy Superligasi
9—16-o'rinlar uchun pley-off bahslari
16 oktyabr, juma
«Tyantszin Teda» — «Shenchjen» 2:0
Gollar: 1:0 – 4 Achimpong, 2:0 – 51 Achimpong.
«Tyantszin Teda»: Ten Shankun, Chjao Xunlyue, Bastians, Jun Xao, Chjen Kaymu, Szyan Shenlun, Achimpong, Sun Yue, Ahmedov, Soares, Su Yuansze.
«Shenchjen»: Go Vey, Ge Chjen, Puraliganji, Szyan Chjipen, Son Chju Hun, Lyu Yue, Van Yunpo, Li Yuanyi, Selnes, Presiado, Gao Lin.
Ogohlantirishlar: Li Yuanyi (11), Szyan Shenlun (23), Puraliganji (24), Kaymu (33), Presiado (71).