Osiyo chempionati 2021 yilga qoldirildi

Joriy yilning 26 fevralidan 8 mart kunigacha Turkmanistonda o'tkazilishi kerak bo'lgan futzal bo'yicha Osiyo Chempionati koronavirus sababli avgust oyiga qoldirilgandi.

Ko'p o'tmay, Turkmaniston Osiyo chempionatini o'tkaza olmasligini ma'lum qilgach, turnir Kuvaytga ko'chirilgani va noyabr oyida o'tkazilishi haqida xabar berilgandi. Ammo Kuvaytdagi vaziyat tufayli turnir 2-13 dekabr kunlariga o'tkazilishi xabar qilingandi.

OFK Kuvaytdagi vaziyatni hisobga olib, oxir-oqibat Osiyo chempionatini 2021 yilga qoldirishga qaror qildi. Turnir mart yoki aprel oyida o'tkazilishi belgilanadi.

Shuningdek, Xitoyda o'tishi lozim bo'lgan 23 yoshlilar o'rtasidagi Osiyo chempionati ham Xitoyning turnirni o'tkazmaslik haqidagi qarori sababli keyingi yilga qoldirilgan. Mezbon nomi tez orada ma'lum qilinadi.