Kanchelskis «Navbahor»ni tark etganini rasman e'lon qildi va klubga omad tiladi

Andrey Kanchelskis LinkedIn'dagi o'zining sahifasi orqali "Navbahor" bosh murabbiyi lavozimini tark etganini e'lon qildi. Rossiyalik mutaxassis klub rahbariyati va muxlislarga minnatdorchilik bildirib, ularga omad tiladi.

"Mening "Navbahor"dagi faoliyatim yakuniga etganidan afsusdaman. Mavsumni ushbu jamoa safida yakunlab, qanday natijaga erishganimizni ko'rmoqchi edim. Ammo hamisha ham vaziyat sen istagandek bo'lavermaydi.

Shunga qaramay, men "Navbahor" rahbariyati, klub xodimlari va o'yinchilarga menga O'zbekistonda unutilmas lahzalarni taqdim etishgani uchun minnatdorchilik bildiraman. Men klub boshqaruvida 2ta davrni o'tkazdim. Hammaga kelajakda omad tilayman.

Albatta, muxlislarga ham katta rahmat aytaman. Ular faoliyatim davomida men duch kelgan eng jo'shqin ishqibozlar hisoblanadi. Ular meni qo'llab-quvvatlashdi va jamoaning rostmana 12-o'yinchisi bo'la olishdi. Umid qilaman, tez orada sizlar "Navbahor" stadionda jonli qo'llab-quvvatlash imkoniyatiga ega bo'lasiz. Yana umid qilamanki, siz bu jamoadan faxrlanasiz.

Men esa murabbiylik faoliyatimdagi yangi sinovlarni intizorlik bilan kutaman", — deya yozdi Kanchelskis.