Venger JCh va Evropa chempionatini tez-tez o'tkazishni taklif qildi

«Arsenal» klubi sobiq bosh murabbiyi, FIFAning global futbolni rivojlantirish bo'limi boshlig'i Arsen Venger Millatlar ligasi musobaqasini bekor qilib, Jahon va Evropa chempionatlarini tez-tez o'tkazishni taklif qildi.

«Millatlar ligasini bekor qilish va hammaga tushunarli bo'lgan musobaqalarni o'tkazish kerak. Ko'chada odamlardan millatlar ligasi nima ekanini so'rang. Hamma ham buni tushuntirib bera olmaydi.

Kamroq musobaqalarni o'tkazish kerak. Har ikki yilda bitta jahon chempionati va bitta Evropa chempionati — zamonaviy futbol uchun munosib variant», – dedi Venger.

Jahon chempionatini tez-tez o'tkazish turnir qadrining yo'qolishiga olib kelmaydimi? Frantsiyalik mutaxassis shunday javob berdi:

«Shunday savol beradiganlarga hamisha javob beraman: musobaqaning qadri uni kutish bilan bog'liq emas, balki uning sifatiga bog'liq. Axir Chempionlar ligasini odamlar har yili tomosha qilishadi. Nazarimda, bu oldinga tashlangan katta qadam bo'lar edi», – dedi Venger "Bild"ga bergan intervyusida.