APLda ishtirok etadigan jamoalar soni 18 tagacha qisqarishi mumkin

«Liverpul» va «Manchester Yunayted» jamoalari Premer Ligaga o'zgartirishlar kiritishga harakat qilmoqda.

Ikki klub birgalikda katta o'zgarishlarga olib keladigan taklif tayyorladi. Loyiha bilan «Liverpul»ga egalik qiladigan AQShning Fenway Sports Group kompaniyasi shug'ullandi.

Unga ko'ra, Premer Liga jamoalari sonini 20 dan 18 taga qisqartirish taklif etilgan. Chempionshipda esa 24 ta jamoa bo'ladi. Uchinchi va to'rtinchi divizionlarda umumiy 90 ta jamoa harakat qiladi.

Moliyaviy tomon haqida gap ketganda, klublar Angliya futbol Ligasiga (EFL) inqiroz vaqtida yordam tariqasida 250 million funt miqdorida avans taqdim etmoqchi. Shuningdek, yiliga daromaddan 25 foiz ulush berish rejalashtirilgan. Yana yuz million funt miqdorida Angliya futbol assotsiatsiyasiga (FA) o'tkazish belgilangan.

Loyihaga ko'ra, Premer Ligada qolganlardan ko'proq muddatdan beri ishtirok etib kelayotgan to'qqiz klub APLning barcha sohalardagi yo'nalishini belgilaydi.

Mazkur rejani EFL rahbari Rik Parri qo'llab-quvvatlamoqda. U «Liverpul» xo'jayinlari, amerikalik investor Jon Genri, shuningdek, aksioneri va direktor Maykl Gordon bilan muzokaralar o'tkazgan. Bundan tashqari Parri «Manchester Yunayted»ga egalik qiladigan Gleyzerlar oilasi bilan ham suhbat qurgan.

Loyiha mualliflari «Manchester Siti», «Arsenal», «Chelsi» va «Tottenhem» kabi katta klublar tomonidan qo'llab-quvvatlashni kutmoqda.