So'nggi 5 yil ichida EChLda kimlar debyut qildi? Ular qanday natija qayd etdi?

Bu mavsumda Evropa Chempionlar ligasida bir yo'la 4 ta klub o'zining debyut uchrashuvini o'tkazadi. «Krasnodar», «Renn», «Istanbul» va «Mityullan» jamoalarini o'z tarixida ilk bor nufuzli musobaqada start oladi. Bu jamoalarning musobaqada qanday ishtirok etishi noma'lum. Xo'sh undan avvalgi debyutantlar qanday natija ko'rsatishgan? Stadion.uz so'nggi 5 mavsum davomida debyut qilgan jamoalar va ularning turnirdagi ishtirokini yodga oladi. 

«Astana» 

Qo'shni Qozog'iston klubi 2009 yilda tashkil topgan bo'lsada, 2015/2016 yilgi mavsumda chinakam katta voqeada ishtirok etishga muvaffaq bo'ldi. Bolgariyalik murabbiy - Stanamir Stoylov shogirdlari EChLning saralash bosqichida katta yo'lni bosib o'tadi. «Maribor», «XIK» va "Apoel« jamoalari to'sig'idan o'tgan qozog'istonliklar »B"guruhidan o'rin oladi. 

Poytaxt klubining joylashgan guruhni oson deb bo'lmaydi. «Benfika», "Atletiko Madrid« va »Galatasaray« jamoalari bilan kurash olib borgan »Astana« chinakam xaratker namoyish etishni uddaladi. Guruh bahslarida atigi ikki bor engilgan jamoa qolgan 4 ta o'yinda durang qayd etishni uddalagani quvonarli. Hatto, Madridning »Atletiko" jamoasi ham Astana shahrida "Astana"ni enga olmadi. Qozog'iston klubi o'z tarixida ilk bor ishtirok etgan musobaqada yaxshi xotiralar qoldirdi desak, adashmagan bo'lamiz. 

«Lester» (Angliya)

2016/2017 yilgi futbol mavsumida 21 asr mo''jizasini amalga oshirgan «Lester» EChLda ko'rinish beradi. O'tgan mavsumda APL oltin medallariga ega chiqqan yigitlarning EChLdagi debyuti ham chakki chiqmadi. Tan olish lozim, ularga qura borasida omad keldi.

«Portu», «Kopengagen» va «Bryuge» jamoalari bilan kurash olib borgan jamoa ortiqcha muammosiz keyingi bosqich masalasini hal etadi. 1/8 bosqichda esa «tulkilar» «Sevilya» bilan to'qnash keladi. Klaudio Raneri shogirdlari Andalusiyada 1:2 hisobida mag'lub bo'lishgach, italiyalik murabbiy iste'foga chiqariladi. Uning o'rnini vaqtincha egallagan Kreyg Shekspir kutilmaganda jasorat ko'rsatadi va javob uchrashuvida Ispanlarni qiyin ahvolda qoldiradi. Kuchli pressingga tayan futbolga «Sevilya» dosh bera olmaydi. 2:0 va «Lester» chorak final ishtirokchisi! 

Keyin «Lester»ga tarkibda kamchiliklar to'sqinlik qilib qoldi. Yarim final yo'llanmasi uchun "Atletiko Madrid« bilan to'qnash kelgan tulkilar mehmonda minimal hisobda engilishadi. Uydagi uchrashuvda esa, 1:1 hisobi tabloda ko'rinish beradi. Yakunda, »matraschilar« keyingi bosqichga yo'l oladi. »Lester" esa, o'zining debyutiga qaramay, Evropaning kuchli sakkizda jamoasidan biriga aylanadi. 

«Karabax» (Azerbaydjan)

2017/2018-mavsumda Azerbayjan futboli katta yutuqqa erishdi. Mustaqillikdan so'ng, ushbu yurt klublaridan birinchi bo'lib «Karabax» Evropa Chempionlar Ligasida ko'rinish berdi. Saralash bosqichida «Samtredia» (Gruziya), «Sherif» (Moldaviya) va «Kopengagen» (Daniya) klublari taslim etiladi. 

Afsuski, Azerbayjan klubiga qur'a omadsiz keldi. «Karabax»dan tashqari, kvartetda "Atletiko Madrid«, »Chelsi« va »Roma« klublari joy olgan edi. E'tiborlisi shundaki, bu guruhdan chiqish Madrid klubiga ham nasib etmadi. Bunda »Karabax"ning xizmatlari ulkan. Aynan ular ikkita uchrashuvda ham «matraschilar» Bilan durang qayd etishgani yakunda Simeone shogirdlarini Evropa Ligasida to'p surishga majbur qiladi. 

Azerbayjan klubi musobaqada o'zidan iz qoldirmagan bo'lsada, "Atletiko Madrid" muxlislari xotirasida abadiy saqlanib qoladi.

«RB Leypsig» (Germaniya)

«RB Leypsig» yaqindagina tashkil topgan klub bo'lishiga qaramay, katta progressni namoyish etib kelmoqda. Ortda qolgan mavsumda «Tottenhem» va "Atletiko Madrid«ni musobaqadan chiqarib yuborgan klub EChLdagi debyutini 2017/17-mavsumda o'tkazgan. E'tiborlisi shundaki, 2015/16 yilgi mavsumda »buqalar" Bundesligada debyut qilishadi va birinchi urinishdayoq kumush medallarga ega chiqadi. Kelasi mavsumda esa, Evropa Chempionlar Ligasining guruh bahsida ishtirok etish huquqini qo'lga kiritishadi. 

«Buqalar» «Portu», «Monako» va «Beshiktash» klublari bilan bir guruhdan joy egallaydi. Achinarlisi shundaki, «Rb Leypsig» «Portu» va «Monako»ni ilk turlarda mag'lub etgan bo'lsada, guruhdan chiqishni uddalay olmadi. «Beshiktash»ga ikkita o'yinda ham mag'lub bo'lgan klub, o'z uyida «Monako» bilan durang qayd etadi va 3-o'rinda qolib ketadi. Shunga qaramay, klub o'sishda davom etdi va o'tgan mavsumda musobaqaning yarim finaliga qadar etib keldi. Tan olish lozim, zamonaviy futbolda bunday tez suratda odimlayotgan boshqa klubni uchratmaysiz. 

«Xoffenxaym» (Germaniya)

Aslida mo''jazgina Zinsxaym shahri sharafini himoya qiluvchi klub 2017/18 yilgi mavsumda musobaqada ishtirok etishi mumkin edi, biroq «Liverpul» to'sig'idan o'ta olmadi. Keyingi mavsumda esa, «Xoffenxaym» Bundesligada 3-o'rinni egalladi va to'g'ridan-to'g'ri yo'llanmaga ega bo'ldi. 

Tezkor va hujumkor futbolni targ'ib qiluvchi jamoa «Manchester Siti», «Shaxtyor» va «Lion» bilan bir guruhdan o'rin egallaydi. Afsuski, «qishloqliklar»ga katta musobaqalarda ishtirok etish tajribasi etishmadi. Guruhdagi 6 ta o'yinning 3 tasida durang qayd etilgan bo'lsa, qolgan 3 ta o'yinda nemis klubi mag'lubiyatga uchraydi. Shunday bo'lsada, ular ishtirokidagi 3 ta durang natijasi kishi ko'zini qamashtiradi. Ayniqsa, «Lion» bilan (3:3, 2:2) o'yinlar chinakam trillerga aylanib ketadi. 

«Atalanta» (Italiya)

2019/20 yilgi mavsumda Italiyaning "Atalanta" jamoasi muxlislariga kutilmagan sovg'a taqdim etdi. Bergamoliklar guruh bahslarida 3 ta mag'lubiyat qabul qilib olganiga qaramay, ikkinchi davradagi barcha uchrashuvlarda muvaffaqiyatli ishtirok etdi pley-off yo'llanmasini qo'lga kiritdi. 

Hal qiluvchi bosqichda «Valentsiya» bilan to'qnash kelgan Gasperini shogirdlari kutilmaganda sermahsul va tomoshabob futbol namoyish etishni boshladi. Ikkita uchrashuvda «Valentsiya» darvozasiga 8 ta gol kiritishga muvaffaq bo'lgan jamoa chorak final yo'llanmasini qo'lga kiritadi. 

Agar musobaqa formatiga o'zgarish kiritilmaganida, jamoa yanada uzoqroqqa borishi mumkin edi. Bitta uchrashuvda hal etilgan bahslarda "Atalanta"ga sovuqqonlik etishmadi. Yarim final yo'llanmasi uchun bo'lgan kurashda jamoa PSJ bilan kuch sinashdi. O'yinning 89 daqiqasiga qadar hisobda oldinda borgan klub 150 soniyada 2 ta gol o'tkazib yubordi va uyga ravona bo'ldi. Alamli mag'lubiyatga qaramay, Gasperini o'z shogirdlari bilan faxrlanishini yashirib o'tirmadi.