Eldorning agenti: «Shomurodov Osiyoda yulduz»

Yaqindagina «Jenoa» klubi bilan shartnoma imzolagan Eldor Shomurodovning agenti Qaxxor Mo'minov transfer tafsilotlari bilan o'rtoqlashadi. «Pro Sport Menegment» a'zosi Shomurodovning oldida boshqa variantlar ham bo'lganini yashirib o'tirmadi.

“2017 yilda biz Eldor bilan hamkorlikni boshlagan edik. Yodimda bor, uni ilk bor ko'rganimizda Evropada to'p surishga qodir futbolchi ekanligini sezganmiz. E'tiborlisi shundaki, uning o'zi ham Evropaga ketishni istadi. Uning maydondagi harakatlarini ko'rgach, buning imkoni bor ekanligini sezdik.

Biz barchasini amalga oshirish maqsadida reja tuzdik. Unga ko'ra, Eldor avvaliga RPLda o'zini ko'rsatishi lozim edi. Rejamizning birinchi qismini Shomurodov mukammal ado etdi. Endi esa, rejaning ikkinchi qismi ham amalga oshirdi.

E'tiborlisi shundaki, Eldor bilan bir nechta Osiyo grandlari qiziqib qolgan edi. Yaxshi maosh va xotirjam hayot tarzi taklif qilinganiga qaramay, Eldor Evropaga yo'l olishni afzal ko'rdi. Ayniqsa, Qit'a birinchiligidan so'ng, u bilan Xitoy, Saudiya Arabistoni, Qatar klublari jiddiy qiziqib qolgan edi. U bugungi kunda Osiyo futbolining eng yorqin yulduzlaridan biri. Quvonarlisi shundaki, Eldor moliyaviy qulay imkoniyatlarni rad etdi va Evropaga yo'l oldi.”

Manba: Stadion.uz