Kelajakda «Oltin to'p» uchun kurashidagan futbolchilar Top 5

Sir emas, Ronaldo va Messining davri tobora o'tib bormoqda.«Oltin to'p» qariyib 10 yildan oshiq muddat davomida ikki «Gigant» tomonidan band qilingandi… Vaqt o'z so'zini aytmay qo'ymaydi, deganlaridek, ularga ham oliy hakam o'z so'zini o'tkazmoqda. O'z – o'zidan bir savol tug'iladi. Kelajakda bu sovringa kimlar da'vogar bo'la oladi?!

Bugun shu savolga javob topishga urunib ko'ramiz

Vinicius Junior

Hali 20 yoshga ham to'lmagan Braziliyalik iqtidor egasi ko'plab yoshlar singari «Real Madrid»da yo'qolib qolmadi. U hammani hayratda qoldirgancha, asosiy tarkib o'yinchisiga aylanib bormoqda. Eng quvonarlisi shundaki, Vinitsius qo'rqmasdan o'yinni o'ziga bo'ysundura oladi va tezkor qaror qabul qilish xususiyatiga ega. Kelajakda uning atrofida jamoa tuziladigan bo'lsa, qahramonimiz o'zining to'liq imkoniyatlarini ko'rsata oladi. Afsuski, u Ronaldo bilan bir jamoada o'ynay olmadi. Bunday yosh va iqtidorli hujumchi uchun Krish yaxshigina mahorat maktabini o'tab berishi mumkin edi… Mutaxassislar uning potentsialini juda ham yuqori baholashmoqda. Sababi, unda «Oltin to'p»ni qo'lga kiritish uchun mahorat etarli, faqat, ishlashdan to'xtab qolmasa bo'lgani

Djeyden Sancho

«Manchester Siti» rahbariyati bu bolaga ishonqiramagan va boshqa ayrim sabablarga ko'ra Dortmundning «Borussiya»siga arzimagan pulga sotib yuborishgan edi. Sancho yangi jamoasida o'zining nimalarga qodir ekanligini namoyon qilib kelmoqda. Hozirda uning «sovchilari» ko'pligiga qaramasdan futbolchi klub bilan uzoq muddatli shartnoma tuzdi. U o'zini Bundesligada suvda yurgan baliqdek his qilmoqda. Uning Pako Alkaser bilan birgalikda hujumda ko'rsatayotgan «tomoshalari» butun Evropani hayratga solmoqda. Bu mavsum «Bavariya» jamoasi deyarli chempionlikni qo'ldan boy berib bo'ldi. Sababi, azaliy raqiblari bo'lmish «Borussiya» fantastik formada. Jeydon Sancho o'z ustida ishlashdan to'xtab qolmasa, uni ajoyib kelajak kutmoqda.

Jurnalistlar unga bejiz “ «Oltin to'p» ga «tortadi» “, -degan tashxisni qo'yishmagan. Jeydon maydonda juda tez va taktik ko'rsatmalarni to'liq bajarishi bilan ko'plab klublarning transfer nishoni bo'lib turibdi. «Borussiya» esa unga oid hech qanday takliflarni hali-beri ko'rib chiqmasligini ochiqchasiga e'lon qildi.

Matteys De Ligt

Aql bovar qilmas jismoniy va ruhiy tayyorgarlikka ega zamonaviy markaziy himoyachi De Light hozirning o'zidayoq qariyib butun Evropaning transfer shortlistidan joy olgan. U maydonda yurak bilan emas, aql bilan harakat qiladi va vaziyatlarni oldindan o'qiy oladi. To'p uchun kurashda tanasi bilan foulsiz engib chiqadi va tezkor qarshi hujum boshlay oladi…

Uning imkoniyatlari haqida gapirsak, gap ko'p. Bir so'z bilan aytganda u Serxio Ramos va Puyol singari haqiqiy sardor va etakchi. Yosh bo'lishiga qaramasdan, terma jamoa uchun ham 13 ta o'yinda maydonga tushgan qahramonimizning kelajagi porloq. Faqat o'sishdan to'xtab qolmaslik zarur. Aks xolda, Balotellining kuni uning ham boshiga tushishi aniq.

Klian Mbappe

Bu futbolchi shu yoshidayoq ko'plab yulduzlar uchun orzu bo'lgan JCh g'olibligiga erishishga ulgurdi. Fantastik tezlik va o'z kuchiga ishonch uni sekundsayin ulg'aytirib bormoqda. Hozirgi kunda Transfermarketning eng qimmat futbolchisi sanaladigan qahramonimiz 2018-yilda «Oltin to'p» ni olishga to'liq haqli edi. Afsuski, Modrich klub miqiyosidagi g'alabalari evaziga so'rovnomada yutib chiqdi. Mbappe shu ro'yxatdagi yigitlarning ichida birinchilardan bo'lib «Oltin to'p» ni qo'lga kiritsa kerak. Sababi, unda buning uchun iqtidor va mahorat etarli. Faqat klublar o'rtasidagi sovrinlarni yutish qoldi, xolos.

Bonus

Fedor Chalov

Moskvaning «SSKA» jamoasi yosh hujumchisi hozirda RFPL da to'purarlar bahsida etakchilik qilmoqda. Undagi favqulotda iqtidor haqida to'xtalmasak bo'lmaydi. So'nggi yillarda Chalov singari klassik hujumchilar sayyoramizda juda ham kamayib ketdi. Men uning o'yinlariga qarab Fernando Marientesni ko'rgandek bo'laman. Vaziyatlardan ortiqcha ehtiroslarga berilmay, sovuqqonlik bilan foydalanadigan hujumchiga hozirda bir nechta top klublar qiziqib qolgan. Lekin «Armiyachilar» uni hali-beri qo'yib yubormoqchi emas. Chalov «Oltin to'p» uchun kurashga qo'shilishi haqiqatdan yiroq, lekin uning iqtidorini alohida ko'rsatishga qaror qildik.

Yahyoxo'ja Ulug'xo'jaev