Prevyu: «Lokomotiv» - «So'g'diyona». O'zaro «hisob-kitob»li o'yin

O'zbekiston Superligasi 18-tur bahslari davom etadi. Bugun, tur doirasida Jizzax, Qarshi va Navoiyda uchrashuvlar bo'lib o'tadi.

Tushkunlikdan chiqib kelayotgan “Lokomotiv“, natijalarni bundan ham yaxshilash va birinchi davrada o'z uyidagi mag'lubiyatning “xuni“ni talab qilib, mehmondagidan ko'ra o'z maydonida nisbatan yaxshiroq natijalar qayd etayotgan “So'g'diyona“ bilan qarama-qarshilik uchun Jizzaxga safar qiladi. Andrey Miklyaev va Temur Kapadze qo'l ostida jamoa qatorasiga 4 o'yindirki mag'lub bo'lmayapti. O'tgan mavsum chempionatni kuchli uchlikda yakunlagan Ulug'bek Baqoev shogirdlarining esa hozirgi ahvolini normal holat deb bo'lmaydi. Shu boisdan ham, asosiy urg'u raqibning kim bo'lishidan qat'iy nazar, g'alabaga qaratiladi.

Jizzaxliklar Toshkentda kechgan uchrashuvda, 14 yil deganda erishilgan g'alabani mezbon sifatida ham takrorlashga urinib ko'rishadi. “Bo'rilar“dan alami bor “temiryo'lchilar“ esa kichik seriyani davom etishi uchun g'alabaga da'vogar.

O'zaro o'yinlarda 11 ta gol urib, o'z darvozasidan 42 ta to'p o'tkazib yuborgan Jizzax jamoasi, turnir jadvalida 22 ochko bilan 8 o'rinda borayotgan toshkentliklardan 1 pog'ona pastda, 20 ochko jamg'argan holda borishmoqda. Demakki, komissar Laziz Qo'chqorov, nazoratchi Dmitriy Roman hamda Jasur Muxtorov, Avaz Abdullaev, Sardor Nishonboev, Sanjar Nazarov jamoasidan iborat rasmiylar boshqarib boradigan bugungi uchrashuvning shiddatli, murosasiz va gollarga boy o'tishiga sabablar etarli.

Bahs soat 17:00da “Sport" telekanali orqali jonli efirda namoyish etiladi.

Dadajon FOZILJONOV tayyorladi.