VIDEO. «Metallurg» – «Lokomotiv» o'yini natijasiga ta'sir qilgan xato haqida

Futbolda hakamlarning xatolariga ko'p bor guvoh bo'lganmiz. Rivojlangan mamlakatlarda allaqachon VAR tizimi yo'lga qo'yilgan va u millionlar o'yini ishqibozlari, futbolchilar hamda murabbiylarning e'tirozlariga chek qo'ydi deyishimiz mumkin.

Bizda ham shu tizimni futbolga olib kirish harakati boshlangan. Katta ehtimol bilan keyingi mavsumdan e'tiboran videoassistentlar bosh hakamning eng yaqin yordamchisiga aylanar.

Afsuski, Coca Cola Superligasining aksariyat turlarida hakamlar tomonidan qabul qilanayotgan ba'zi qarorlar ishqibozlar noroziligiga sabab bo'lyapti. “Metallurg” – “Lokomotiv” uchrashuvidan keyin klub matbuot xizmatiga bekobodlik yuzlab muxlislardan qo'ng'iroqlar bo'ldi. “O'yin translyatsiyasini “Sport” telekanali orqali tomosha qildik. Temiryo'lchilar ikkinchi golni qoidaga xilof ravishda kiritishdi. Bu esa o'yinning yakuniy natijasiga ta'sir ko'rsatdi. Bunga kim chora ko'radi?” – degan savolni o'rtaga tashlashyapti.

Albatta, hakamlar faoliyatiga baho beradigan tashkilot, insonlar bor. Qolaversa, “Sport” telekanalida efirga uzatiladigan “Bizning futbol” dasturidagi “Referi taym” ruknida munozarali vaziyatlar ko'rib chiqadi. “Metallurg” – “Lokomotiv” uchrashuvidagi bu holatni ham biz ushbu mutassaddilar hukmiga qoldiramiz.

Shuning barobarida, “Lokomotiv” jamoasi tomonidan kiritilgan ikkinchi gollik hujum paytida to'p maydondan chiqib ketganmidi yoki yo'qmi, aziz muxlis bunga o'zingiz ham baho berishingiz mumkin...

"Metallurg" klubi matbuot xizmati.