«Istiqlol» bosh murabbiyi: «Biz chorak finalga chiqishga munosib edik»

Eronning "Istiqlol" klubi bosh murabbiyi Majid Namju-Mutlaq "Paxtakor"ga qarshi bo'lib o'tgan Osiyo chempionlar ligasi nimchorak final bahsi (1:2) borasida o'z fikrini bildirib o'tdi.

"Jamoam chorak finalga chiqishga munosib edi. Ammo men "Paxtakor"ni tabriklashim kerak.

Bizda yaxshi jamoa yig'ilgan. Biz esa ko'p ishladik. Lekin futbolda ba'zan shunaqasi ham bo'lib turadi. Sizga nisbatan bosim bo'lganida butun o'yin davomida jismoniy jihatdan ko'p kuch sarflaysiz va kontsentratsiyani yo'qotasiz. Diabate bilan shunday holat yuz berdi. Odatda u bunday vaziyatlarda oson gol uradi, ammo charchoq o'z so'zini aytdi.

Jarohatlangan futbolchilar bor edi va biz ularning xizmatidan foydalana olmadik. Bundan tashqari ba'zi futbolchilar charchab qolishgani uchun tarkibga o'zgartirish kiritishga to'g'ri keldi. Barcha o'yinchilar o'yinidan qoniqish hosil qildim. Ular uchrashuv boshidan oxirigacha kurashishdi", — dedi tehronliklar bosh murabbiyi.