Baxtiyor Ashurmatov: «Bunyodkor»ga qarshi o'yin jamoamiz uchun burilish o'yini bo'ladi»

“Qo'qon-1912” jamoasi uchun superliganing 2-davrasi biroz ko'ngilsiz natijalar bilan boshlandi. Jamoa ketma-ket ikkita o'yinda mag'lubiyatga uchradi. Biz jamoadagi vaziyat hamda o'zlarining salomatliklari borasidagi savollar bilan jamoamiz bosh murabbiyi Baxtiyor Ashurmatovga murojaat qildik.

1. Baxtiyor A'zamovich avvalo sog'liklaringiz yaxshimi?

-Gapni ochig'i Buxoroda bo'lgan o'yindan keyin tomog'im bo'g'ilib qolgan edi. Ertasiga ozgina temperaturam ko'tarildi. Shu sababli Metallurgga qarshi o'yinga tayergarlik jarayonida qatnasha olmadim. Lekin o'yinga bir kun qolganda Qo'qonga kelib Metallurg bilan o'yinni o'zim boshqardim. Gapni ochig'i o'yindan keyin kasalim yana ozgina kuchaydi. So'g'diyona bilan o'yindan oldin PTsR analizini topshirdik. Analiz javoblari yaxshi chiqdi. Va mashg'ulotni o'zim o'tkazishga qaror qildim. Lekin afsuski mashg'ulotda sovuq o'tib temperaturam ko'tarilib ketti. Xolatim shu darajaga etdiki, quvvatsizlikdan aktiv xarakat qilishim xam og'irlashib qoldi. Va yana mashg'ulotlarni qo'yvorishga majbur bo'ldim. Bu vaqt ichida o'pkamni rentgen qildirib ko'rganimda 15 foizga o'pka shamollashi, engil pnevmoniya tashxisini qo'yishdi. Va vrachlar klinikaga yotib davolanishni yoki uy sharoitida davolanish uchun qo'shimcha davolanish kursini yozib berishdi. Afsuski shu sababli So'g'diyona bilan bo'lgan muxim o'yinni o'tkazib yuborishga majbur bo'ldim. Xudoga shukr hozir axvolim nisbatan yaxshi va jamoamizning mashg'ulotlariga qo'shildim.

2. “Qo'qon-1912” jamoasi mavsumning birinchi yarmini ko'tarinki ruhda o'tkazdi ham turnir jadvalida 3-o'rinni egallagan edi. Kutilmaganda 2-davra uchrashuvlarini durang hamda mag'lubiyatlar bilan boshladik. Bunga qanday izoh berasiz?

-To'g'ri 1-davra o'yinlarini ko'tarinki ruxda o'tkazdik. Afsuski 2-davra o'yinlarini muvaffaqiyatsiz boshladik. Muxlislarimiz xam xavotirga tushishmoqda. Xar xil gap so'zlar ko'paymoqda. Afsuski betobligim tufayli o'zim 10-kun ichida faqat Metallurg bilan o'yinga va faqat bitta mashg'ulotga chiqa oldim xolos. Lekin murabbiylarimiz shtabi yaxshi shakllangan. Zohidaka Nurmatov va Davron Fayziev boshchiligida mashg'ulotlar yaxshi saviyada olib borilgan. Davron Fayziev yaxshi saviyadagi murabbiy va ishonchli do'st ekanligini bilaman. Zoxidaka Nurmatov esa meni yarim so'zdan tushunadigan ishonchli insonim va yordamchim. Aytmoqchi bo'lganim mag'lubiyatlarda bosh murabbiy sifatida o'zim aybdorman. Ikkinchi davrada omad ham bizni tark etgandek. Yana bitta xatoimiz birinchi davradan keyin tarkibimizni o'zgartirmaganimiz degan xulosaga kelyapman. Ayrim sabablarga ko'ra hohlagan o'yinchilarimizni jamoaga ololmadik. Aytaylik Samarqanddan Amirjon Safarov transferi uchun 100 million so'm so'rashdi. Istiqloldan yosh xujumchi Akbar Sultonovni Istiqlol qo'yib yubormadi. Javoxir Siddiqovni olamiz deganimizda Javoxir Paxtakor tarkibida asosiy tarkibda chiqa boshladi. Paxtakordan Asadbek Sobirjonovni xam afsus ijaraga ololmadik. To'g'ri tarkibimiz emon emas. Lekin baribir yangi qon kerak ekan. O'yinimizda xam afsuski pasayish yuzaga keldi. Chempionat o'yinlarini bir xil tempda o'tkazish xam oson emas. Misol uchun Navbaxor ettita o'yindan beri yutolmayapti. Yaxshi tarkibga ega bo'lgan Agmk 4-o'yinda g'alaba qozonolmadi. O'ylaymanki bu qiyin vaziyatdan yigitlar bilan birga yorug' yuz bilan chiqib ketamiz.

Ikkita mag'lubiyat bizni xam juda xavotirga solmoqda. Eng yomoni 1-davrada mag'lubiyatga uchragan o'yinlarimizda oxirigacha kurashib mag'lubiyatga uchragandik. Ikkita o'yinda esa afsuski xarakter va oxirigacha kurashish etishmadi. Shu sababli So'g'diyona bilan o'yindan keyin yigitlar bilan gaplashib oldik. Ikkita o'yindagi mag'lubiyat sabablarini tahlil qildik. Va men o'ylaymanki keyingi o'yinlarda muxlislarimiz yana jangovor o'yinlarga guvox bo'lishadi. To'g'ri jamoa g'alaba qozonganda kamchiliklar xam ko'zga tashlanmaydi. Jamoaning xarakteri, axilligi shunaqa qiyin paytda bilinadi.

3. Hozirgi kunda jamoadagi ichki muhit va jamoa a'zolarining salomatliklari qanday, oldindagi uchrashuvlarga hamma tayyormi ya'ni tarkibda yo'qotishlar yo'qmi?
-Xudoga shukr hozir jamoamizdagi ichki muhit ijobiy tomonga o'zgargan. Muhit yaxshi bo'lishida va qiyin vaziyatdan chiqib ketishimizda jamoamiz etakchilari Murod Xolmuhammedov, Quvondiq Ro'ziev, Aleksandr Merzlyakovlarning roli katta bo'lishi kerak. Tarkibida shunaqangi etakchi futbolchilari va ular qatorida Oybek Rustamov, Suxrob Berdiev kabi futbolchilar bo'lgan jamoa xar doim yuqori o'rinlar uchun kurashishi kerak. Murod Xolmuxamedovni esa bemalol O'zbekistonning bu yilgi mavsumdagi eng kuchli futbolchilari qatoriga qo'shsak bo'ladi. Ro'zievdan xam umidim juda katta. Chempionatning eng mexnatkash futbolchilaridan biri.

Afsuski, yurtimizga kelgan pandemiya jamoamizni xam chetlab o'tmadi. Lekin biz qanday natija ko'rsatishimizdan qatiy nazar bu kasalliklarni sabr va bardosh bilan engib o'tishga qaror qilgandik. Jamoamizdagi deyarli xamma futbolchilar bu kasallikni engib o'tishdi. Vaqti kelganda o'yin qaydnomasiga kiritishga o'yinchi xam etmay qoldi. Jamoamiz etakchisi Murod Xolmuxamedov, Quvondiq Ro'zievlar o'yinlarni o'tkazib yuborishdi. Muzaffar Muzaffarov olti oy deganda jaroxatidan qutulib endi safimizga qo'shildi. Afsuski So'g'diyona bilan o'yindan oldin darvozabonimiz Muzaffar Abdullaev va hujumchimiz Xamidullo Abduxamidovda xam test natijalari yaxshi chiqmadi va ular o'yinni o'tkazib yuborishdi. Lekin bu o'yinlarni muvaffaqiyatsiz o'tkazishimizga sabab bo'la olmaydi. Ikkita futbolchimizdan tashqari qolgan futbolchilarimiz xudoga shukr sog' salomat va Bunyodkor bilan bo'ladigan o'yinga tayyor.

4. Bizni oldinda “Bunyodkor” jamoasiga qarshi uchrashuv kutib turibdi. Bu o'yin olti ochkolik o'yin bo'lishi aniq. Muxlislarimiz esa o'z maydonimizda jamoadan faqat g'alaba kutishadi.

-"Bunyodkor" bilan juda xam muhim bo'lgan qiyin o'yin kutib turibdi. Bu bizning jamoamiz uchun burilish o'yini bo'ladi. Biz muxlislarimiz uchun xam bu o'yinda g'alaba qozonishimiz kerak. Afsuski jamoamiz uchun qiyin bo'lgan vaziyatda muxlislarimizning qo'llab quvvatlashlari jamoamizga etishmayapti. Har yili superligada qolish uchun kurashadigan jamoa o'z ishonchli o'yinlari bilan muxlislar mexrini va ishonchini qozondi. Va endi muxlislarimiz bizdan yuqori o'rinlar uchun kurashishimizni kutishmoqda. . Va muxlislarimiz bunga haqlilar. Futbolda muxlislar ishonchini, mexrini qozonish juda qiyin. Lekin ishonchni yo'qotish juda oson. Futbolchilarimiz xam vaziyatni tushunib turishibdi va "Bunyodkor"ga qarshi o'yinda vaziyatni o'nglash uchun bor kuchlarini ishga solishadi. Biz murabbiylar shtabi futbolchilarimizga ishonamiz.


5. Jamoada moliyaviy muammolar yo'qmi? Murabbiy hamda futbolchilar maosh va mukofot pullarini o'z vaqtida olishyaptimi?

-Xudoga shukr jamoamizda moliyaviy muammolar yo'q. Baxtiyoraka Tolipov boshchiligidagi rahbariyatimiz oylik maoshlari va mukofot pullarini vaqtida berishyapti. Shuhrataka Mo'minov esa ajoyib tashkilotchi. O'yinlarga tayergarlik ko'rish jarayoni, mashg'ulotlar uchun maydon topishda, kasallangan futbolchilarimizni davolash uchun dori-darmon etkazishda, mehmonxonalarga joylashishimiz, futbolchilarning ovqatlanish jarayonlari, Toshkentdagi yig'inlar tashkil qilishda Shuhrat akaning o'rni beqiyos. Umuman olganda Qo'qonda tashkiliy ishlar yuqori darajada yo'lga qo'yilgan. Jamoamiz futbolchilari nomidan jamoamiz rahbariyatiga yaratilayotgan sharoitlar uchun minnatdorchilik bildirgan bo'lardim.

6. Muxlislarimizga tilaklaringiz?

-Muxlislarimiz jamoamiz baxtiga doimo sog' salomat bo'lishsin. Iltimos jamoamizni qiyin paytda xam qo'llab-quvvatlab turishsin. Futbolda g'alaba va mag'lubiyat doimo yonma-yon yuradi. Lekin ishonch bilan aytamanki muxlislarimiz ishonchini hech qachon suistemol qilmaymiz. Jamoamizga ishonishsin. Biz muxlislarimiz uchun o'ynaymiz. Xudo hohlasa tezroq stadionga qaytinglar va jamoamizni qo'llab quvvatlanglar. Muxlislarsiz futbolning xam fayzi yo'qolarkan. Tez orada muxlislarning stadionlarga kirishlariga ruxsat beriladi deb ishonib qolamiz. Barcha aziz muxlislarimizga sog'lik tilayman !
"Qo'qon-1912" matbuot xizmati