Tur yakunlari: Ikkinchilik uchun zichlik, o'zgarmagan o'rtalik

O'zbekiston Superligasining 15 tur bahslari 15 16 17 sentabr kunlari bo'lib o'tdi.

Dushanba kunida Qarishining “Nasaf“ jamoasi Andijonga safar qildi. Etakchi o'rinlar uchun kurash olib borayotgan Ro'ziqul Berdiev shogirdlari, Bobur Abduxoliqovning goli evaziga, “Andijon“ni kichik, 1:0 hisobida mag'lub etdi. Musobaqa avvalidan buyon hali biron marta g'alaba nashidasini his etmagan vodiyliklar yangi ustozi Baxtiyor Hamidullaev oldingi chiziqlardagi kamchiliklar, jismoniy tayyorgarlik, kadrlar masalalari haqida gapirib, bu muammolar ustida ishlanayotganligini takidladi. Hozircha, yangilanayotgan “burgutlar“ 6 ochko bilan, eng quyi pog'onadan siljishganicha yo'q.

Shu kuni yana bir bahs, Toshkentda “Lokomotiv“ hamda “Navbahor“jamoalari o'rtasida kechdi. Unda, o'z natijalarni yangi mutaxassislar bilan yaxshilashga urinayotgan “temiryo'lchilar“ Namangandan tashrif buyurgan raqiblari ustidan 1:0 hisobida zafar quchishdi. O'yindagi yagona golga Avazbek O'lmasaliev mualliflik qildi. Yangi bosh murabbiy Andrey Miklyaev va uning yordamchisi Temur Kapadzelar boshqaruvida jamoa, ikkinchi g'alabasini qayd etdi. Bu orqali toshkentliklar, o'z imkoniyatlarini biroz yaxshilagan holda, 18 ochko bilan 9 o'ringa ko'tarildi. Barqarorlikni yo'qotib qo'yayotgan mehmonlar katta murabbiyi Numon Xasanov, qayd etilayotgan natijalarni ayni pandemiya vaziyati jamoada qiyin kechgani va muhitning biroz ko'ngildagidek emasliga bilan izohladi. Ayni paytda “lochinlar“ 15 o'yindan so'ng 20 ochko jamg'arib, ekvator chizig'ida borishmoqda.

Ikkinchi futbol kunida, kuchli uchlikdagi o'rinlar uchun jiddiy kurash olib borayotgan “Qo'qon-1912“ hamda “Metallurg“ jamoalari to'qnash kelishdi. Qizg'in va shiddatli kechgan bahsda mehmonlar vodiydan 3 ochko olib qaytishdi. “Metallurg“ safida gollarga Abror Toshqo'ziev va Shahzod Ubaydullaevlar mualliflik qilishdi. Bekobodliklar 4 o'yindan iborat kichik g'alabali seriya namoyish etayotgani diqqatga sazovor. Ammo, bu seriya kelasi turda barham topadi. Ushbu mag'lubiyatdan so'ng, 26 ochko bilan 5 o'rinni band etgan Baxtiyor Ashurmatov shogirdlari kuchli uchlik bilan oradagi farqning katta emasligini hisobga olib, jiddiy kurashda davom etishadi. Andrey Shipilov jamoasi esa 29 ochko to'plagan 4 o'rindagi “Nasaf“dan bir ochko va bir pog'ona pastda boryapti.

Shu kuni, Muborakdagi “Bahrom Vafoev“ nomli o'yingohda mehmon bo'lgan “Bunyodkor“ mezbon “Mash'al“ ustidan zafar quchdi 1:2. Uchrashuvning 2 daqiqasidayoq, Rahimjon Davronovning xatosi tufayli bir kishi kam bo'lib qolgan muborakliklar darvozasiga mehmonlar safidan, Xurshid G'iyosov hamda Nurillo To'xtasinovlar to'p kiritishdi. Kamchilik bo'lsada raqiblariga etarlicha qarshilik ko'rsata olgan mezbonlar vakili Sirojiddin Qo'zievning goli esa durrang uchun ham etarli bo'lamdi. Shu tariqa “qaldirg'ochlar“ 29 ta yani, yaqin ta'qibchisidan 1 ochko kam to'plab, 3 o'rindan joy olishdi.

Payshanba kuni bo'lib o'tgan qarama-qarshiliklarda jamoalar murosa ko'chasini tanlashdi.
Dastlab, “Surxon“ hamda “Qizilqum“ bahsida nursiz durrang qayd etildi. Shundan so'ng mehmonlarning Termizdagi g'alabasiz o'yinlar soni 7 taga etdi. Jamoalarning turnir jadvalidagi quyi o'rinlarida esa o'zgarish bo'lmadi. Navoiyliklar 11 ochko bilan 11 o'rin, Ravshan Haydarov qo'l ostidagi klub esa 9 ochko bilan 12 o'rinni band etishdi. Muxlislar, Olmaliqdagi markaziy stadionda start olgan uchrashuvda ancha qiziqarli to'qnashuning guvohi bo'lishdi. Ma'lum muddat 10 kishi bo'lib qolgan “AGMK“ mag'lubiyatdan qutilib qoldi. Himoyachilarning xatosidan unumli foydalangan Javohir Qahramonovning goliga keyinchalik, Mate Vatsadze javob qaytardi. Tablodagi hisob yakuniy hushtak chalingunga qadar saqlanib qoldi. Shu tariqa olmaliqliklar 30 ochko bilan vitse etakchilikni qaytarib oldi. Jizzaxliklar esa umumiy 17 ochko jamg'argan holda, 10 o'ringa tushishdi.

Xalqaro maydondagi ishtirok tufayli, ushbu turni muddatidan avval o'tkazgan “Paxtakor“ “Buxoro“ga hech qanday imkoniyat qoldirmadi. Igor Sergeev, Jaloliddin Masharipov, Akromjon Komilov va Dragan Cheranlar kiritgan gollari toshkentliklarning karvonboshiligini yanada mustahkamladi.

Dadajon Foziljonov