Mourino evrokuboklardagi 100-g'alabasini qo'lga kiritdi

«Tottenxem» Evropa ligasi 2-saralash bosqichidan o'rin olgan Bolgariyaning «Lokomotiv» klubiga qarshi o'yinda irodali g'alabani qo'lga kiritdi.

«Shporlar» bosh murabbiyi Joze Mourino uchun ushbu g'alaba evrokuboklardagi yubiley — 100-g'alaba bo'ldi. Portugaliyalik mutaxassis ushbu g'alabalarni «Chelsi» (30 g'alaba), «Real» (24), «Manchester Yunayted» (18), «Portu» (16), «Inter» (10) va «Tottenxem» (2) klublari boshqaruvida qo'lga kiritgan.

Mourino faoliyati davomida 4ta evrokubokni qo'lga kiritgan: ikkita Chempionlar ligasi (2004 yilda «Portu» va 2010 yilda «Inter» bilan), UEFA kubogi (2003 yilda «Portu» bilan) va Evropa ligasi (2017 yilda «Manchester Yunayted» bilan).