Davron Fayziev: "Bugun olti ochkolik o'yin bo'ldi"

Superligasining 15-tur doirasidagi "Qo'qon-1912" - "Metallurg" uchrashuvidan keyingi matbuot anjumanining ikkinchi qismida jamoamiz katta murabbiyi Davron Fayziev ishtirok etdi.

- O'yin haqida to'xtaladigan bo'lsak, bir-biriga o'xshamagan bo'limlarga guvoh bo'ldik. Turnir jadvaliga yonma-yon borayotgan jamoalar bahsi bo'ldi. Bugungi o'yin olti ochkoli o'yin bo'ldi. Ikkinchi bo'limdagi tezkor gol rejalarimizni o'zgartirib yubordi. Futbolchilarimiz tomonidan yo'lga qo'yilgan qo'pol xatolar raqiblarimiz foydasiga ishladi. O'z maydonimizdagi birinchi uchrashuvdagi mag'lubiyat alamli ekanligini aytishim joiz. Keyingi o'yinlarda yo'qotilgan ochkolar o'rnini qoplashga harakat qilamiz. Ertadan boshlab keyingi o'yinga futbolchilarimizni tayyorlashni boshlaymiz.

Birinchi taymda vaziyatlar yaratdik, lekin ulardan foydalana olmadik. Ikkinchi bo'limda esa raqibimiz bizni xatolarimizdan unumli foydalanishga harakat qildi va qaysidir ma'noda bunga erishdi. Bugun birinchi bo'lib biz gol urganimizda boshqacha bo'lardi. Maydon xolatini mag'lubiyatga bahona sifatida ko'rsatmagan bo'lardim, chunki har ikki jamoa ham mana shu maydonda harakat qildi. Bu bahona bo'la olmaydi. Futbol shunday o'yin kimdir g'alaba qozonadi, kimdir yutqazadi. Hali oldinda 11 ta tur o'yinlari bor , o'ylaymanki yo'qotilgan ochkolarni o'z joyiga qo'yishga ulguramiz.