"PSJ" sport direktori: "Tayyorgarlik ko'rish uchun vaqtimiz yo'q edi"

Frantsiyaning «PSJ» klubi sport direktori Leonardo yangi chempionatga ko'rilgan tayyorgarlik haqida fikr bildirdi.

«Marsel»ga qarshi bo'lib o'tgan o'yindan keyin menga bosh murabbiy haqida savollarni berish noo'rin. Bu natija hech narsani o'zgartirmaydi. Men bu haqda har kuni gapirmoqchi emasman. Evropaning boshqa ligalari endi chempionatni boshladi. Liga 1 esa biz EChLning finalida o'ynayotgan kunlarimiz - 22-23 avgust kunlari boshlandi. Shu sababli, jamoamizda yangi chempionatga tayyorgarlik ko'rish uchun vaqt yo'q edi.

Shuningdek, jamoamiz koronavirusdan azob chekdi. Pandemiya paytida ishlash qiyin. Mahalliy muvaffaqiyatsizlikdan keyin baho berishga hali erta. Ortda qolgan olti oy davomida juda yaxshi ishlarni amalga oshirdik. Hozir esa «Pari Sen-Jermen» muvaffaqiyatga muhtoj», — dedi Leonardo.