UEFA Evrokuboklar to'liq o'tmagani sabab TV-huquqlardan qancha pul yo'qotgani ma'lum bo'ldi

UEFA koronavirus pandemiyasi sabab Evrokuboklar 2019/20 yilgi mavsumi to'liq asnoda o'tmagani tufayli 575 million evro daromaddan quruq qoldi.

Evropa klublari assotsiatsiyasi rahbari Andrea Anellining ma'lum qilishicha, UEFA Chempionlar Ligasi va Evropa Ligasi televizion huquqlari uchun to'lanishi kerak bo'lgan miqdordan 575 million evro kam daromad qilgan.

Yo'qotilgan mazkur pullar klublarning mukofot pulidan ushlab qolinishi yoki UEFA tomonidan kompensatsiya qilinishi mumkin. Anelli bu masaladagi savolga aniqlik kiritmagan.

Reglamentga ko'ra, 2,55 milliard miqdoridagi pul Evrokubok ishtirokchilariga mukofot puli sifatida bo'lib berilishi kerak edi.

Evrokuboklarning umumiy daromadi 3,25 milliard evroga baholangandi.

Eslatib o'tamiz, Evrokuboklar koronavirus pandemiyasi sabab mart oyida to'xtab qoldi. Musobaqa avgust oyida «sakkiz finalchi» tizimida o'tkazildi va buning natijasida o'yinlar soni kamaydi.