Ehsoni Panchshanbe: “Navbahor”ning g'alabalariga munosib hissamni qo'shish niyatidaman”

Xabaringiz bor, jamoamizning yangi a'zosi - tojikistonlik yarim himoyachi Ehsoni Panchshanbe 6 sentyabr kuni “Navbahor” safida ilk mashg'ulotini o'tkazdi. Mashg'ulot yakunlangach, futbolchi bilan qisqacha suhbat uyushtirdik.

- "Navbahor”ga Sizni kim taklif qildi?

- Klub rahbariyati meni “Navbahor”da ko'rish niyatida “Istiqlol” jamoasi va agentim bilan muzokaralar olib bordi hamda yakunda barchasi ijobiy tarzda yakunlanib, namanganliklar tarkibiga qo'shildim hamda klub bilan 2,5 yillik shartnoma imzoladim.

Meni jamoada juda iliq tarzda kutib olishdi. Buning uchun “Navbahor” klubi rahbariyati va jamoa murabbiylar shtabi hamda yangi jamoadoshlarimga o'z minnatdorchiligimni bildiraman.

- Yurtimizga kelguningizcha, O'zbekiston futboli va “Navbahor” jamoasi haqida ma'lumotga egamidingiz?

- Albatta. O'zbekiston chempionatini ancha kuchli deb hisoblayman. O'zbek futbolchilaridan ayni paytda murabbiylik qilayotgan Mirjalol Qosimovni juda yaxshi bilaman. Hozirgi o'zbekistonlik futbolchilardan esa Eldor Shomurodov, Oston O'runov va Jasur Yaxshiboevning o'yinlarini kuzatganman.

- Muxlislarga tilaklaringiz...

- “Navbahor” tarkibiga qo'shilishim aniq bo'lganidan so'ng, ko'plab namanganlik ishqibozlar shaxsiy telegramimga xabarlar yo'llab, meni sevimli jamoalari safiga qo'shilayotganim bilan qutlashdi hamda omad yor bo'lishini tilashdi. Buning uchun “Navbahor” muxlislariga o'z minnatdorchiligimni bildiraman. Xudo xohlasa, klub rahbarlari va ishqibozlarning ishonchlarini oqlab, “Navbahor”ning g'alabalariga munosib hissamni qo'shish niyatidaman. Faqatgina muxlislar jamoamizni doimo qo'llab - quvvatlab turishsa bo'lgani. Barcha namanganlik muxlislarga sihat – salomatlik, oilaviy baxt tilayman.

Manba: “Navbahor” PFK matbuot xizmati