Sakkiz yillik alam

Shveytsariya hamda Germaniya terma jamoalari o'rtasida o'tadigan bugungi o'yin har tomonlama qiziq.

Bu yurt vakillari oxirgi bor sakkiz yil burun o'rtoqlik o'yinida uchrashishgan va unda 5:3 hisobida “banklar yurti” g'alaba qozongan edi. Katta turnirga tayyorgarlik ko'rayotgan Ioaxim Lyov doimgidek eksperement ishlarida qovun tushirib qo'ygan: Yangi himoyachilar va yangi posbon xatolarga yo'l qo'yib, Shveytsariyaning ajoyib g'alabasiga zamin hozirlagandi.

Hozirda nemislarda u tarkibda faqat Gyundogan va Draksler qolgan. Mezbonlarda faqat Granit Jaka o'sha tarkibdan. 2012 yilning oqshomida ter Shtegen darvozasiga xet-trik yo'llagan Eren Derdiyuk hozirgi kunda “Paxtakor”da. Vladimir Petkovichga kerakmas holga tushib ulgurgan. Faqat Derdiyukmas, qolgan “qahramonlar” haqida shunday gaplar – ularning aksari bugun katta futbolda eslanmaydilar.

Germaniya alam olishiga ishonsak bo'ladi. Shakiri, Mehmedi, Zakaria va Sherning bugungi bahsni o'tkazib yuborishi shveytsariyaliklarga qimmatga tushishi mumkin.

Lyov yigitlari qanday vajohatda o'ynashlarini bilamiz. Sakkiz yil oldingi alam mayli, Ispaniya bilan o'yindagi so'nggi soniyalarda o'tkazib yuborilgan gol ham ularning kayfiyatiga jiddiy ta'sir o'tkazgan. O'yin arafasida “aybim shuki, uchrab qolding qornim ochganda” degan gapni ishlatmasak bo'lgani...

Ammo shuncha gap-so'zdan keyin ham Shveytsariya matbuoti: “Oxirgi payt nemislar u qadar qo'rqinchli emas, buning ustiga bu o'yinda jahon yulduzlari – Noyer, Kimmix, Goretska va Gnabriga umid bog'lay olmaydi. Nima uchun tavakkal qilmasligimiz kerak?” deb yozmoqda. Rostan ham nima uchun tengma teng o'yin ko'rsatib, Ukrainadan uchralgan mag'lubiyat tasodifligini isbotlash mumkin emas?!

Zo'r o'yin. Birga ko'ramiz. 23:45dan boshlab Uzreport kanalida!

Xayrulla Hamidov.