Iguainning agenti: «Gonsalo «Yuventus»ni tark etadi»

«Yuventus» hujumchisi Gonsalo Iguainning akasi va agenti Nikolas Iguain 32 yoshli ukasi turinliklar safini tark etishini ma'lum qildi.

«Gonsalo «Yuventus»ni tark etadi. Biz shartnomani bekor qilish borasida muzokara olib boryapmiz. Pipita Italiya chempionatida boshqa o'ynamaydi», — dedi Nikolas Iguain "Tuttosport" nashriga bergan intervyusida.

Avvalroq Iguain faoliyatini AQSh chempionatida davom ettirishi haqida xabar tarqalgan edi. Argentinalik futbolchi Devid Bekxemga tegishli bo'lgan «Inter Mayami» bilan shaxsiy shartnoma borasida kelishuvga erishgan.

Iguain 2016 yilda 90 million evro evaziga «Napoli»dan «Yuventus»ga o'tgan edi. Uning "keksa sinora" bilan shartnomasi kelasi yilning yozida yakuniga etadi. Gonsalo "Yuve" safida 149ta o'yinda maydonga tushib, 66ta gol urdi.