Azizbek Turg'unboev: «Muxlislarga bayram sovg'asi sifatida g'alaba qozonish niyatidamiz»
/ Kiritdi: BestMaster Ko'rilgan: 263
“Navbahor”ning mahoratli yarim himoyachisi Azizbek Turg'unboev Vadim Abramov murabbiylik qilayotgan O'zbekiston milliy terma jamoasining navbatdagi o'quv-mashg'ulot yig'iniga chaqiruv oldi.
Mazkur yig'in doirasida terma jamoamiz 3 sentyabr kuni Toshkentda Tojikiston terma jamoasiga qarshi o'rtoqlik uchrashuvi o'tkazadi.
Ushbu o'yindan oldin “Navbahor” 2-davraning dastlabki o'yini, ya'ni Coca Cola Cuperliga 14-turidan o'rin olgan bahsda o'z maydonida ayni paytdagi turnir jadvali peshqadami, amaldagi chempion “Paxtakor”ni qabul qiladi.
Mazkur uchrashuv oldidan Azizbek Turg'unboev o'z fikrlarini bildirib o'tdi.
"So'zim avvalida barcha hamyurtlarimizni Vatanimiz mustaqilligining 29 yilligi bilan tabriklab, ularga uzoq umr, sihat-salomatlik, oilaviy baxt tilayman. Osmonimiz doimo tinch va musaffo, mustaqilligimiz abadiy bo'lsin, ilohim!
Bo'lajak o'yin borasida gapiradigan bo'lsam, xabaringiz bor, Toshkentda bo'lib o'tgan markazlashgan chempionat bahslarida unchalik omadimiz kelmadi. Shu bois, bugungi uchrashuvda mazkur bahsni oynai jahon orqali kuzatadigan muxlislarimizning ishonchlarini oqlash, g'alaba qozonish uchun barcha imkoniyatimizni ishga solamiz.
To'g'ri, “Paxtakor” kuchli raqib. Lekin har qanday raqibni mag'lubiyatga uchratsa bo'ladi. Ta'kidlaganimdek, buni amalga oshirish uchun maydonda jon-jahdimiz bilan harakat qilamiz.
Jamoadoshim Igor Golban bilan birgalikda men ham milliy terma jamoamizning o'quv-mashg'ulot yig'iniga jalb etildim. Bugungi o'yinda zafar quchgan holda, bosh jamoamizning yig'iniga yaxshi kayfiyatda yo'l olmoqchimiz.
Bugun muxlislarga bayram sovg'asi sifatida g'alabani tortiq etish niyatidamiz.
Barchangizga yana bir marta Istiqlol bayrami muborak bo'lsin, aziz vatandoshlar!", — dedi Turg'unboev.
Bosh sahifaga
179