«Man Siti» Messini sotib olish imkoniyatini ko'rib chiqmoqda

«Manchester Siti» «Barselona» hujumchisi Lionel Messining transferi qancha tushishini hisob-kitob qilmoqda. Bu haqda ESPN xabar tarqatdi.

«Shaharliklar»ning taxminicha, argentinalik futbolchining transferini amalga oshirish qiyin bo'ladi, ammo "ko'k-anorranglilar" uni sotishga rozi bo'lsa, har ehtimolga qarshi jamoa tayyorgarlik ko'rib qo'ymoqchi.

Shuning uchun «Manchester Siti» transfer uchun xarajatlarni hisob-kitob qilib qo'ymoqchi. Shuningdek, «Siti» moliyaviy halol o'yin qoidasini buzmasdan Messini sotib olish mumkinligini chamalamoqda.

Avvalroq 33 yoshli futbolchiga «PSJ» va «Inter» klublari qiziqish bildirayotgani haqida xabar tarqalgan edi. Leoning «Barsa» bilan shartnomasida badal puli sifatida 700 mln evro ko'rsatilgan.