UEFA superkubogi-2020 haqida batafsil ma'lumot

2020 yilgi UEFA superkubogi haqidagi barcha ma'lumotlar bilan tanishtirib o'tamiz.

Qachon va qaerda?
UEFA superkubogi 24 sentyabr kuni Budapesht shahridagi "Pushkash Arena" stadionida bo'lib o'tadi. Unda Evropa ligasi g'olibi "Sevilya" va Chempionlar ligasi g'olibi "Bavariya" klublari to'qnash kelishadi. Uchrashuv Toshkent vaqti bilan 00:00da boshlanadi.

Avvalgi yillarda UEFA superkubogi Praga (2013), Kardiff (2014), Tbilisi (2015), Tronxeym (2016), Skope (2017), Tallin (2018) va Istanbul (2019) shaharlarida o'tkazilgan. Ungacha esa uchrashuv doimiy ravishda Monakoda tashkil etilgan.

2020 yilgi bahs dastlab 12 avgust kuni Portu shahridagi "Dragau" stadionida o'tkazilishi kerak edi. Ammo COVID-19 pandemiyasi tufayli o'yin Budapeshtga ko'chirildi.

Tomoshabinlar kiritiladimi?
Hozirda UEFA tasarrufi ostidagi barcha musobaqalar bo'sh stadionlarda o'tkazilmoqda. UEFA 19 avgust kuni tashkilotga a'zo barcha 55 milliy assotsiatsiyalar bilan videokonferentsiya o'tkazib, tomoshabinlarni asta-sekin stadionlarga qaytarish imkoniyatini muhokama qildi. UEFA superkubogi uchrashuviga esa cheklangan miqdorda muxlislarning kiritilishi rejalashtirilmoqda.

UEFA superkubogi nima?
Ikkita evrokuboklarning g'oliblari o'rtasida o'yin tashkil qilish g'oyasi niderlandiyalik jurnalist Anton Vitkampga tegishli. Chempionlar kubogi/Chempionlar ligasi g'olibi doimo unda ishtirok etib kelgan. Ikkinchi ishtirokchi sifatida turli yillarda yo Kubok egalari kubogi (1972-1999), yoki UEFA kubogi/Evropa ligasi (2000-...) g'olibi tanlangan.

Kim ko'p g'olib chiqqan?
2019 yilda UEFA superkubogini "Liverpul" qo'lga kiritgan. Ammo EChL g'olibi hamisha ham Superkubokda g'alaba qozonavermagan. Shu paytgacha Superkubok uchun o'tkazilgan 44ta bahsning 24tasidagina Chempionlar kubogi/Chempionlar ligasi sohibi g'alaba qozongan. "Barselona" va "Milan" klublari UEFA superkubogini qo'lga kiritish bo'yicha rekordchi hisoblanishadi — 5 martadan.

Keyingi UEFA superkubogi uchun bahslar qaerda o'tkaziladi?
Keyinga 3 yilda UEFA superkubogi uchun uchrashuv quyidagi shaharlarda o'tkazilishi rejalashtirilgan: Belfast (2021), Xelsinki (2022) va Qozon (2023).