Romelu Lukaku Evropa ligasi rekordini yana yangiladi

"Inter" hujumchisi Romelu Lukaku Evropa ligasi finalida "Sevilya" darvozasiga gol urib, o'ziga tegishli rekordni yana yangiladi.

Belgiyalik forvard Evropa ligasining ketma-ket 11ta uchrashuvida gol urishga muvaffaq bo'ldi. Lukaku "Inter" safida Evropa ligasi doirasida 6ta o'yinda 7ta gol urdi. Avvalroq futbolchi turnirning 1/16 final bosqichida bo'lib o'tgan «Ludogorets»ga qarshi har ikkala o'yinda (2:1, 2:0), keyin esa «Xetafe»ga qarshi nimchorak final bahsida (2:0), chorak finalda «Bayer»ga qarshi uchrashuvda (2:1) hamda "Shaxtyor"ga qarshi yarim final bahsida (5:0) ham gol urgan edi.

"Inter" joriy mavsumni Chempionlar ligasida boshlab, guruhda 3-o'rinni egallagani uchun o'z ishtirokini Evropa ligasida davom ettirdi.

Lukaku so'nggi marta 2014/2015 yilgi mavsumda «Everton» safida Evropa ligasida ishtirok etganida, guruh bosqichining 5-turidan boshlab, chorak final bosqichi uchrashuvlariga qadar ketma-ket 5ta o'yinda 8ta gol urgan edi.

27 yoshli Lukaku joriy mavsumda "Inter" safida barcha musobaqalar doirasida 51ta o'yinda maydonga tushib, 34ta gol urdi va 5ta golga uzatma berdi. Uning "neradzurri" bilan shartnomasi 2024 yilga qadar tuzilgan.

Evropa ligasidagi golli o'yinlar seriyasi bo'yicha ikkinchi natija Alan Shirerga tegishli bo'lib, u ketma-ket 8ta uchrashuvda gol urgan edi.