Ravshan Haydarov: «Vazifam – shu futbolchilar bilan natija ko'rsatish»

Coca Cola Superliganing 10-turidan o'rin olgan “Surxon” – “Navbahor” (1:1) jamoalari o'rtasidagi uchrashuvdan keyingi matbuot anjumanining birinchi qismida “Surxon” bosh murabbiyi Ravshan Haydarov ishtirok etib, jurnalistlarning savollariga javob berdi. Uning fikrlari esa quyidagicha bo'ldi.

"Bugungi o'yin qiziqarli tarzda kechdi. Birinchi bo'limning 15-20 daqiqasi “Navbahor”ning ustunligida o'tdi, keyin esa shogirdlarim o'zlariga kelib, o'z o'yinlarini ko'rsatishni boshlashdi.

Ikkinchi bo'limda umuman boshqacha futbol bo'ldi. O'ylaymanki, bugun 3 ochkoga loyiq o'yin ko'rsatdik. Omadsizlik tufayli durang qayd etdik. Xatolardan xulosa qilib, keyingi o'yinga tayyorgarlik ko'ramiz. Dastlabki 20 daqiqa mahalla futboliga o'xshab ketgani rost. Menimcha, bunga pandemiya sababli, yuzaga katta tanaffus, keyin himoyada etakchi futbolchilarimiz yo'qligi sabab bo'ldi. Menimcha, Darko Stanoevich bo'lganida yigitlar o'yinni xotirjam tarzda o'tkazishardi.

To'g'ri, o'yin oxirida futbolchilarda toliqish bo'ldi. Zaxiramiz uzun emas, jarohat olganlar bor. Yosh futbolchilarni maydonga tushirishga hayiqdim. To'g'ri, reja bo'yicha ketma-ket o'yinlarga tayyor bo'lishimiz kerak. Jarohat olgan futbolchilar safga qaytishlarini kutamiz. Afsuski, bugun Aleksandr Kasyan to'rtinchi sariq kartochkasini oldi va keyingi bahsda bizga yordam bera olmaydi.

Bubanya bilan deyarli ishlamadim. Andijonga borib, 5 daqiqa o'ynaganini hisobga olmasak, qaytib kelganidan keyin yo'q bo'lib qoldi. Pandemiya tufayli karantin bo'ldi, uyiga ketganini eshitdim. Uning shartnomasi qanday edi, to'g'risi xabarim yo'q. Shu bois, bu borada boshqa hech narsa ayta olmayman.

Jamoa o'yinida xatoliklar va kamchiliklar bor. Kelganimdan keyin o'z falsafamni singdirib borishga intilyapman. Bu borada ishlayapmiz.

“Surxon”da tajribali futbolchilar ko'pmi? Bilasiz, men jamoaga mavsum yarmida keldim, futbolchilar menga qadar klubga kelishgan. Mening vazifam tarkibdagi shu bor futbolchilar bilan natija ko'rsatish.

Bugungi o'yin hakamlarining harakatlariga izoh bera olmayman. Ularni nazorat qiladigan komissiya bor", — dedi Haydarov.

“Navbahor” PFK matbuot xizmati.

Manba: pfcnavbahor.uz