Shahram G'iyosov: «Barcha kamarlarni qo'lga kiritmoqchiman»

Professional ringda o'zining o'ninchi g'alabasini qo'lga kiritgan Shahram G'iyosov nikaragualik Uiston Kamposga qarshi jangdan keyin o'z fikrini bildirib o'tdi.

"Uchinchi raund so'ngida raqibning jigar qismiga yo'llagan zarbamni his qildim. Uning qanchalik og'ir bo'lganini Kamposning nafas olishi qiyinligidan ham sezildi.

Chempionlik uchun jangga tayyormanmi? Murabbiylarim ertaga jang qilasan desa, men tayyorman. Men Vatanimdan olisda shunchaki boks tushish uchun yurganim yo'q. Men o'z vazn toifamdagi barcha chempionlik kamarlarini qo'lga kiritmoqchiman. Hozircha bu kamarlar boshqalar qo'lida. Men esa bu kamarlar tomon qadamba-qadam yurib boraman va ularni o'zimniki qilib olaman", — dedi Shahram G'iyosov.